Toshkent shahar IIBB 20-dekabr kuni Humo Arena majmuasida Hammali & Navai guruhining konsert dasturiga tashrif buyurishni rejalashtirayotgan fuqarolar uchun qator tavsiyalar berdi.
Boshqarmaning qayd etishicha, “tiqilinchliklarga yo‘l qo‘ymaslik maqsadida” konsert boshlanishidan kamida 1 soat oldin kelish lozim.
Elektron chiptalar soxtalashtirilishi mumkinligi sababli IIBB Humo Arena majmuasida tashkil etilgan kassada ularni qog‘ozli chiptalarga almashtirib olishlarini tavsiya qilmoqda.
Humo Arena majmuasiga sektor kesimida kirish quyidagi yo‘laklar orqali amalga oshiriladi:
- B, C sektorlarida o‘tiruvchilar 1-sonli kirish punktidan;
- C, D sektorlarida o‘tiruvchilar 2-sonli kirish punktidan;
- A, D sektorlarida o‘tiruvchilar 3-sonli kirish punktidan;
- B, A sektorlarida o‘tiruvchilar 4-sonli kirish punktidan.
Eslatib o‘tamiz, 25-noyabr kuni Toshkentda qozog‘istonlik qo‘shiqchi Jah Khalib konserti bo‘lib o‘tgan Humo Arena majmuasiga kirishda tiqilinch va tartibsizliklar yuz bergandi. Milliy gvardiya maʼlumotlariga ko‘ra, mingdan ortiq fuqaro skanerlangan chiptalarni takroran taqdim etgani uchun kiritilmagan.
Milliy gvardiya Toshkent shahri bo‘yicha boshqarmasi bergan ma’lumotga ko‘ra, konsert dasturi uchun chiqarilgan 10 mingdan ortiq elektron chiptalar sotib olingan. Humo Arena saroyiga kirish uchun tashrif buyurgan fuqarolarning chiptalari iTicket xodimlari tomonidan maxsus skaner qurilmasining QR-kodi orqali tekshirilib kiritilgan. O‘rindiqlar to‘lgan bo‘lsa-da, tashqarida konsertga kirish istagida bo‘lgan mingdan ortiq fuqaro qolib ketgan.
Ushbu fuqarolarning elektron chiptalari kirish joyida takroran taqdim etilayotgani ham aniqlangan va bunday chipta egalari nazorat o‘tish joyidan ichkariga qo‘yilmagan. Ular chiptalarni tanishlari yoki boshqa jismoniy shaxslardan sovg‘a sifatida hamda pul evaziga qo‘lga kiritgani maʼlum bo‘lgan. Ayrim fuqarolar elektron chiptalarni o‘z manfaati yo‘lida takroran sotgani aniqlangan.
Izoh (0)