“O‘zbekiston Respublikasi Transport vazirligi huzuridagi Transport nazorati inspeksiyasi faoliyatini tashkil etish chora-tadbirlari to‘g‘risida”gi Vazirlar Mahkamasi qarori qabul qilindi, deb xabar beradi Norma.
Hujjat bilan Transport vazirligi huzuridagi Transport nazorati inspeksiyasi to‘g‘risidagi nizom tasdiqlandi. U quyidagilarni belgilaydi:
- Inspeksiyaning maqomi va faoliyatini tashkil etish asoslari;
- vazifalari, funksiyalari, huquqlari hamda uning xodimlarining javobgarligi;
- transport sohasida qonunchilik hujjatlarida belgilangan talablarga rioya etilishi ustidan nazoratni amalga oshirish.
Shuningdek, harakatdagi temir yo‘l tarkibi va infratuzilmasi obyektlarini davlat ro‘yxatidan o‘tkazish bo‘yicha davlat xizmatlarini ko‘rsatishning maʼmuriy reglamenti tasdiqlandi. U quyidagilarni belgilaydi:
- harakatdagi temir yo‘l tarkibi va infratuzilmasi obyektlarini davlat ro‘yxatidan o‘tkazishning talablari hamda davlat xizmatini ko‘rsatish tartibi;
- harakatdagi temir yo‘l tarkibi va infratuzilmasi obyektlarini davlat ro‘yxatidan o‘tkazish, ro‘yxatdan qayta o‘tkazish hamda ularga ro‘yxatdan o‘tkazilganligi to‘g‘risida guvohnoma berish tartibi.
Transport vazirligiga quyidagilar topshirildi:
- 2024-yil 1-noyabrga qadar harakatdagi temir yo‘l tarkibi va infratuzilmasi obyektlarini davlat ro‘yxatidan o‘tkazish axborot tizimini ishlab chiqish hamda ishga tushirish;
- 2024-yil 1-dekabrga qadar Raqamli texnologiyalar vazirligi bilan birgalikda axborot tizimining YIDXP bilan integratsiya qilinishini hamda tasdiqlangan Maʼmuriy reglamentga muvofiq davlat xizmatlari joriy etilishini taʼminlash.
Hujjat Qonun hujjatlari maʼlumotlari milliy bazasida eʼlon qilingan va 2023-yil 18-dekabrdan kuchga kirdi.
Oktyabr oxirlarida prezidentning tegishli qarori bilan Jamshid Karimov Transport vazirligi huzuridagi Transport nazorati inspeksiyasi boshlig‘i lavozimiga tayinlangan edi.
Izoh (0)