Тошкент шаҳар ИИББ 20 декабрь куни Humo Arena мажмуасида Hammali & Navai гуруҳининг концерт дастурига ташриф буюришни режалаштираётган фуқаролар учун қатор тавсиялар берди.
Бошқарманинг қайд этишича, “тиқилинчликларга йўл қўймаслик мақсадида” концерт бошланишидан камида 1 соат олдин келиш лозим.
Электрон чипталар сохталаштирилиши мумкинлиги сабабли ИИББ Humo Arena мажмуасида ташкил этилган кассада уларни қоғозли чипталарга алмаштириб олишларини тавсия қилмоқда.
Humo Arena мажмуасига сектор кесимида кириш қуйидаги йўлаклар орқали амалга оширилади:
- Б, C секторларида ўтирувчилар 1-сонли кириш пунктидан;
- C, Д секторларида ўтирувчилар 2-сонли кириш пунктидан;
- А, Д секторларида ўтирувчилар 3-сонли кириш пунктидан;
- Б, А секторларида ўтирувчилар 4-сонли кириш пунктидан.
Эслатиб ўтамиз, 25 ноябрь куни Тошкентда қозоғистонлик қўшиқчи Jah Khalib концерти бўлиб ўтган Humo Arena мажмуасига киришда тиқилинч ва тартибсизликлар юз берганди. Миллий гвардия маълумотларига кўра, мингдан ортиқ фуқаро сканерланган чипталарни такроран тақдим этгани учун киритилмаган.
Миллий гвардия Тошкент шаҳри бўйича бошқармаси берган маълумотга кўра, концерт дастури учун чиқарилган 10 мингдан ортиқ электрон чипталар сотиб олинган. Humo Arena саройига кириш учун ташриф буюрган фуқароларнинг чипталари iTicket ходимлари томонидан махсус сканер қурилмасининг QR-коди орқали текширилиб киритилган. Ўриндиқлар тўлган бўлса-да, ташқарида концертга кириш истагида бўлган мингдан ортиқ фуқаро қолиб кетган.
Ушбу фуқароларнинг электрон чипталари кириш жойида такроран тақдим этилаётгани ҳам аниқланган ва бундай чипта эгалари назорат ўтиш жойидан ичкарига қўйилмаган. Улар чипталарни танишлари ёки бошқа жисмоний шахслардан совға сифатида ҳамда пул эвазига қўлга киритгани маълум бўлган. Айрим фуқаролар электрон чипталарни ўз манфаати йўлида такроран сотгани аниқланган.
Изоҳ (0)