Raqamli xizmatlar bilan vaqtni tejash, hayotni oson va qulay qilish mumkin” — Raqamli hukumat loyihalarini boshqarish markazi mutaxassisi

Hozirgi kunda ko‘plab hujjat ishlarini onlayn, uyda yoki ish joyida o‘tirgan holda bitirish mumkin.

Binobarin, hozirgi zamon kishisining vaqti tig‘iz, vazifasi ko‘p, har tomonlama tejamkor takliflarga talabi yuqori. Bugun my.gov.uz xizmatlari aholiga qaysi jihatlari bilan manzur bo‘layotgani haqida Raqamli hukumat loyihalarini boshqarish markazi mutaxassisi Bobur Nurmanov bilan suhbatlashdik.

- Raqamli texnologiyalarning rivojlanishi onlayn xizmatlar soni va sifati oshishiga, aholining bu kabi qulayliklarni tushunib, ularni tanlashiga sabab bo‘lmoqda. Ayting-chi, my.gov.uz qanday afzalliklari bilan insonlarni jalb etdi?

- Sir emas, turli masalalarda, masalan, sertifikatlar yoki ruxsatnomalar olish, davlat idoralaridan tegishli hujjatlarni rasmiylashtirishni o‘ylagan odam borki, ovoragarchilik, qog‘ozbozlik, keti uzilmaydigan navbatlardan yurak oldirib qo‘ygan.

Shuning uchun ham fuqarolarimiz bunday ishlarni murakkab, yugur-yuguri ko‘p, ortiqcha vaqt talab qiladigan yumush deb bilib, ular bilan shug‘ullanishni paysalga solishadi yoki ayrim hollarda hujjatlashtirish niyatidan voz kechib qo‘ya qolishadi.

Biroq vaziyat taqozo qilsa, biror ruxsatnoma yoki oddiy maʼlumotnoma olishga majbur inson anʼanaviy holatda hamma ishlarini tashlab, alohida vaqt ajratib, vakolatli davlat idorasiga boradi, aksiga olib murojaatchilar soni ko‘p bo‘lsa, navbat kutib butun kunni shu ishga bag‘ishlashiga to‘g‘ri keladi.

Fuqarolarimiz duch kelishi mumkin bo‘lgan mana shunday holatlarning oldini olish maqsadida Yagona interaktiv davlat xizmatlari portali – my.gov.uz joriy etilgan.

Bugungi kunda aholimizning 77 foizi internet foydalanuvchilari hisoblanar ekan, bu o‘z navbatida onlayn xizmatlarga bo‘lgan talab ortganidan ham darak beradi. Joriy yilda my.gov.uz portalidagi xizmatlar soni 550 tadan oshdi. 7 milliondan ortiq aholi va tadbirkorlar davlat xizmatlaridan my.gov.uz portali va uning mobil ilovasi orqali foydalanishga o‘tdi.

Xususan, joriy yilda yangi ishga tushirilgan haydovchilik guvohnomasini yangilash (95 000 ta ariza), talabalar turar joyiga joylashish uchun ariza yuborish (55 000 ta ariza) kabi xizmatlardan jami 24 mln marotaba foydalanilgan.

Elektron xizmatlardan foydalanish orqali fuqarolarimiz, avvalo, qimmatli vaqtlarini tejashga, shuningdek, davlat idoralari tomonidan ko‘rsatilayotgan pullik xizmatlar uchun to‘lovlarni amalga oshirishda o‘z mablag‘larini iqtisod qilishga erishadi.

my.gov.uz orqali elektron xizmatlardan foydalanish inson ishtirokini maksimal darajada kamaytirib, murojaatingiz qonunchilikda belgilangan muddatlarda ko‘rib chiqilishini kafolatlaydi, asosiysi, kimlargadir aldanib qolish xavfidan xoli bo‘lasiz.

Yana bir eʼtiborli jihati shundaki, my.gov.uz orqali fuqarolar arizalari asosida vakolatli davlat organlari tomonidan berilgan har bir elektron hujjat vakolatli shaxslar tomonidan imzolanib, muhrlanadigan qog‘oz hujjatlar bilan bir xil yuridik kuchga ega.

– Vaqt tejamkorligi masalasi – tushunarli, ammo siz mablag‘ iqtisod qilinishi haqida ham gapirdingiz. Bunda nima nazarda tutildi?

– Aytmoqchi edimki, fuqarolar my.gov.uz orqali pullik elektron xizmatlardan foydalanishda qonunchilikda belgilab qo‘yilgan xizmat narxidan 10 foiz arzonroq to‘lashadi. Bundan tashqari, foylanuvchining nogironligi elektron axborot almashinuvi orqali tasdiqlangan fuqarolarimizga 50 foiz chegirma beriladi.

Taʼkidlab o‘tmoqchimanki, mazkur chegirmalar qo‘llanishi davlat idorasi tomonidan ko‘rsatilayotgan xizmatning sifatiga, xizmat ko‘rsatish muddatiga hamda yakuniy natijaga mutlaqo taʼsir qilmaydi.

Davlat idorasiga yoki davlat xizmatlari markaziga tashrif buyurib, ariza qoldirilganda esa borib-kelish uchun sarflanadigan yo‘lkira xarajatidan tashqari qonunchilikda belgilangan pullik xizmat narxini ham chegirmalarsiz to‘lashga to‘g‘ri keladi.

Mana nima uchun ko‘p yurtdoshlarimiz kundalik hayotiy masalalarni hal qilishda elektron xizmatlardan foydalanishni afzal ko‘rishmoqda.

Yana bir muhim maʼlumot, my.gov.uz orqali fuqarolarimiz 200 dan ortiq xizmatlardan foylanishda mutlaqo pul to‘lashmaydi. Shuningdek, alohida vaqt ajratib davlat idorasiga borib-kelish xarajatlarini ham tejashlari mumkin.

- Bepul xizmatlardan eng ommaboplarini sanab o‘tolasizmi?

- Ha albatta, yuqorida aytganimdek, my.gov.uz da bepul ko‘rsatilayotgan xizmatlar soni ko‘p va hozir ulardan eng talabgirlarining nomlarini keltirib o‘taman:

1) Bolani davlat maktabgacha taʼlim muassasasiga joylashtirish uchun ariza berish (shu kunga qadar 6,3 mln marta foydalanilgan);

2) Fuqarolarni jamg‘arib boriladigan pensiya taʼminoti tizimiga hisobga qo‘yish (shu kunga qadar 2,3 mln marta foydalanilgan);

3) Hisoblangan ish haqi summalari to‘g‘risida maʼlumot olish (shu kunga qadar 2,1 mln marta foydalanilgan);

4) Soliqdan qarzi mavjud emasligi to‘g‘risida maʼlumotnoma (shu kunga qadar 1,8 mln marta foydalanilgan);

5) Mehnat daftarchasidan ko‘chirma olish (shu kunga qadar 1,4 mln marta foydalanilgan) va boshqalar.

Shuniyam alohida taʼkidlab o‘tish kerakki, elektron xizmatlarning aksariyati avtomatik tarzda ko‘rsatiladi, yaʼni natija olishingiz uchun vaqt talab etilmaydi, so‘ralgan maʼlumotnoma ariza berilgan zahoti hujjat shakllanadi.

- Yagona portaldan asosan necha yoshlilar foydalanishadi?

- Tahlillarga ko‘ra, my.gov.uz foydalanuvchilari 25-34 yosh oralig‘idagi insonlar ekanligi ayon bo‘ldi. Umumiy foydalanuvchilar sonida ularning ulushi 32 foizga teng. Shuningdek, iqtisodiy faol qatlam hisoblanuvchi 35-44 yoshli fuqarolarimizning elektron xizmatlardan foydalanish darajasi ham salmoqli – 23 foizni tashkil etmoqda.

- my.gov.uz dan foydalanish aholimiz uchun qay darajada qulay, u oddiy odamlar uchun tushunarli qilib yaratilganmi?

- Yagona portal ilk bor 2013-yilda ishga tushirilgan bo‘lib, bugungi kungacha bir necha marotaba takomillashtirish ishlari amalga oshirilgan.

my.gov.uz sodda, har bir xizmat tegishliligi bo‘yicha bo‘lim va toifalarga ajratilgan holda tashkillashtirilgan. Tizimga kirish hamda elektron xizmatlardan foydalanish uchun arizalarni to‘ldirish qulay, har qanday internet foydalanuvchisi ishlata oladigan darajada aniq va lo‘nda bo‘lishiga ahamiyat qaratilgan.

Shuningdek, my.gov.uz foylanuvchisi har bir elektron xizmatni olishdan oldin asosiy shartlari (xizmat ko‘rsati narxi, muddati, xizmat ko‘rsatuvchi davlat organi, ushbu organ bilan bog‘lanish maʼlumotlari) aks ettirilgan “Xizmat pasporti” bilan tanishib chiqishi mumkin. Ommabop elektron xizmatlar bo‘yicha tayyorlangan videoyo‘riqnomalar ham xizmat pasportidan o‘rin olgan.

Bundan tashqari, mobil qurilmalar shiddat bilan rivojlanib borayotgan davrga mos ravishda, Android va iOS tizimlari uchun my.gov.uz ning mobil ilovasi ham ishlab chiqilgan bo‘lib, bugungi kunda 1 mln.dan oshiq foylanuvchilar tomonidan ko‘chirib olingan.

- Suhbatingiz uchun tashakkur! Xalqning og‘irini yengil qilishdek mashaqqatli va sharafli ishlaringizda omad yor bo‘lsin!

- Rahmat, elektron xizmatlardan foydalanish bo‘yicha aholining bilim va ko‘nikmalarini oshirishda jurnalistlarning o‘rnini yuqori baholaymiz hamda my.gov.uz ni ommalashtirish bo‘yicha amalga oshirayotgan ishlaringiz uchun minnatdorlik bildiramiz!

Reklama huquqi asosida.