O‘zbekiston xalqaro maydondagi asosiy va jadal rivojlanayotgan davlatlardan biridir. Bu haqda Turkiyaning O‘zbekistondagi favqulodda va muxtor elchisi Olgan Bekar jurnalistlar bilan uchrashuvda ma’lum qildi. Mamlakat diplomatik vakolatxonasi tomonidan tashkil etilgan tadbirda o‘tayotgan yil yakunlari, shuningdek, 2024-yilga mo‘ljallangan bo‘lajak tadbirlar jadvali e’lon qilindi.
Diplomatik missiya rahbari, avvalo, Turkiya Respublikasi nomidan joriy yilning fevral oyida Turkiyada yuz bergan zilzila oqibatida yetkazilgan zararni bartaraf etishda ko‘rsatgan jasorati uchun O‘zbekiston xalqiga minnatdorlik bildirdi.
“Do‘st og‘ir kunda bilinadi. Biz asr fojiasida ko‘rsatgan yordami uchun O‘zbekistondan minnatdormiz”, — deb ta’kidladi elchi Olgan Bekar.
Ayni paytda O‘zbekistondan kelgan qurilish brigadalari halokatli tabiiy ofatdan eng ko‘p jabr ko‘rgan hududlarda uy-joy qurmoqda.
2023-yilda ikki davlat rahbarlari o‘rtasida ko‘plab uchrashuvlar bo‘lib o‘tdi va ular davomida ikki tomonlama munosabatlarni yanada rivojlantirish yuzasidan fikr almashildi. Bu ikki tomonlama hamkorlikni rivojlantirishga katta hissa qo‘shdi.
Yil oxiriga qadar ikki davlat o‘rtasidagi o‘zaro tovar ayirboshlash hajmi 3,2 milliard dollarga yetishi kutilmoqda.Turkiya O‘zbekistonning Rossiya, Xitoy va Qozog‘istondan keyin to‘rtinchi yirik savdo sherigi hisoblanadi. Mamlakat Xitoy va Rossiya bilan birga, O‘zbekistonda eng ko‘p kompaniyalarga asos solgan.
Noyabr oyida O‘zbekiston Respublikasi Prezidenti matbuot xizmati 2023-yil boshidan buyon O‘zbekistonga to‘g‘ridan to‘g‘ri sarmoya sifatida 500 million dollardan ortiq mablag‘ jalb qilingani haqida xabar bergandi. 200 dan ortiq yangi korxona tashkil etilgan.
Hozirda Turkiya va O‘zbekiston o‘rtasida haftasiga 60 dan ortiq reyslar amalga oshirilmoqda. Bu ikki xalqning bir-biriga qiziqishi ortib borayotganidan dalolat beradi.
Turkiyaning O‘zbekistondagi favqulodda va muxtor elchisi Olgan Bekarning ta’kidlashicha, 2023-yil O‘zbekiston uchun muvaffaqiyatli bo‘ldi. Shavkat Mirziyoyevning sa’y-harakatlari bilan O‘zbekistonda tashqi siyosat sohasida katta qadamlar qo‘yildi.
Prezident Shavkat Mirziyoyevning xorijiy safarlari, dunyo yetakchilarining O‘zbekistonga tashriflari O‘zbekiston rahbarining kuchli yetakchi ekanini isbotlaydi. Bu, o‘z navbatida, O‘zbekistonning xalqaro maydondagi yuksak mavqeyidan dalolat beradi.
“Qardosh O‘zbekistonning futbol sohasida obro‘-e’tibori ortib borayotganidan xursandmiz”, — deydi Turkiya elchisi Olgan Bekar. “O‘zbekiston Markaziy Osiyo taraqqiyotida katta rol o‘ynaydi. Turkiya Markaziy Osiyo davlatlari, jumladan, O‘zbekiston taraqqiyotini qo‘llab-quvvatlaydi. O‘tgan yili C5+1 formatida bir qator uchrashuvlar o‘tkazildi. Bu Markaziy Osiyo davlatlari bir ovozdan ish olib borayotganidan dalolatdir. Bu borada O‘zbekistonning o‘rnini alohida ta’kidlash lozim”.
Ikki tomonlama munosabatlarda, ayniqsa, ta’lim, madaniyat va savdo sohalarida hali qilinadigan ishlar ko‘pligini qayd etgan Bekar, 2024-yilda ham bu sohalarda ishlar davom etishini aytdi.
Maʼlumot uchun, 2023-yil dekabr oyi oxirida Anqarada Qo‘shma iqtisodiy komissiya yig‘ilishi bo‘lib o‘tadi.
2024-yilning birinchi choragida esa Anqarada ikki davlat prezidentlari ishtirokida Oliy darajadagi qo‘shma strategik hamkorlik kengashi yig‘ilishi bo‘lib o‘tadi.
Izoh (0)