Ўзбекистон халқаро майдондаги асосий ва жадал ривожланаётган давлатлардан биридир. Бу ҳақда Туркиянинг Ўзбекистондаги фавқулодда ва мухтор элчиси Олган Бекар журналистлар билан учрашувда маълум қилди. Мамлакат дипломатик ваколатхонаси томонидан ташкил этилган тадбирда ўтаётган йил якунлари, шунингдек, 2024 йилга мўлжалланган бўлажак тадбирлар жадвали эълон қилинди.
Дипломатик миссия раҳбари, аввало, Туркия Республикаси номидан жорий йилнинг февраль ойида Туркияда юз берган зилзила оқибатида етказилган зарарни бартараф этишда кўрсатган жасорати учун Ўзбекистон халқига миннатдорлик билдирди.
“Дўст оғир кунда билинади. Биз аср фожиасида кўрсатган ёрдами учун Ўзбекистондан миннатдормиз”, — деб таъкидлади элчи Олган Бекар.
Айни пайтда Ўзбекистондан келган қурилиш бригадалари ҳалокатли табиий офатдан энг кўп жабр кўрган ҳудудларда уй-жой қурмоқда.
2023 йилда икки давлат раҳбарлари ўртасида кўплаб учрашувлар бўлиб ўтди ва улар давомида икки томонлама муносабатларни янада ривожлантириш юзасидан фикр алмашилди. Бу икки томонлама ҳамкорликни ривожлантиришга катта ҳисса қўшди.
Йил охирига қадар икки давлат ўртасидаги ўзаро товар айирбошлаш ҳажми 3,2 миллиард долларга етиши кутилмоқда.Туркия Ўзбекистоннинг Россия, Хитой ва Қозоғистондан кейин тўртинчи йирик савдо шериги ҳисобланади. Мамлакат Хитой ва Россия билан бирга, Ўзбекистонда энг кўп компанияларга асос солган.
Ноябрь ойида Ўзбекистон Республикаси Президенти матбуот хизмати 2023 йил бошидан буён Ўзбекистонга тўғридан тўғри сармоя сифатида 500 миллион доллардан ортиқ маблағ жалб қилингани ҳақида хабар берганди. 200 дан ортиқ янги корхона ташкил этилган.
Ҳозирда Туркия ва Ўзбекистон ўртасида ҳафтасига 60 дан ортиқ рейслар амалга оширилмоқда. Бу икки халқнинг бир-бирига қизиқиши ортиб бораётганидан далолат беради.
Туркиянинг Ўзбекистондаги фавқулодда ва мухтор элчиси Олган Бекарнинг таъкидлашича, 2023 йил Ўзбекистон учун муваффақиятли бўлди. Шавкат Мирзиёевнинг саъй-ҳаракатлари билан Ўзбекистонда ташқи сиёсат соҳасида катта қадамлар қўйилди.
Президент Шавкат Мирзиёевнинг хорижий сафарлари, дунё етакчиларининг Ўзбекистонга ташрифлари Ўзбекистон раҳбарининг кучли етакчи эканини исботлайди. Бу, ўз навбатида, Ўзбекистоннинг халқаро майдондаги юксак мавқейидан далолат беради.
“Қардош Ўзбекистоннинг футбол соҳасида обрў-эътибори ортиб бораётганидан хурсандмиз”, — дейди Туркия элчиси Олган Бекар. “Ўзбекистон Марказий Осиё тараққиётида катта рол ўйнайди. Туркия Марказий Осиё давлатлари, жумладан, Ўзбекистон тараққиётини қўллаб-қувватлайди. Ўтган йили C5+1 форматида бир қатор учрашувлар ўтказилди. Бу Марказий Осиё давлатлари бир овоздан иш олиб бораётганидан далолатдир. Бу борада Ўзбекистоннинг ўрнини алоҳида таъкидлаш лозим”.
Икки томонлама муносабатларда, айниқса, таълим, маданият ва савдо соҳаларида ҳали қилинадиган ишлар кўплигини қайд этган Бекар, 2024 йилда ҳам бу соҳаларда ишлар давом этишини айтди.
Маълумот учун, 2023 йил декабрь ойи охирида Анқарада Қўшма иқтисодий комиссия йиғилиши бўлиб ўтади.
2024 йилнинг биринчи чорагида эса Анқарада икки давлат президентлари иштирокида Олий даражадаги қўшма стратегик ҳамкорлик кенгаши йиғилиши бўлиб ўтади.
Изоҳ (0)