Toshkent shahrida yangi uy-joylar bilan bog‘liq yana bir firibgarlik sodir etilgani aytilmoqda. Bu haqda “Daryo”ga shikoyat qilgan bir guruh fuqarolarning aytishicha, “Zohmir Group” nomli qurilish kompaniyasi shaharning Yashnobod tumanidagi yangi qurilayotgan 9 ta xonadondan iborat uch qavatli uylarini 39 nafar fuqaroga pullagan. “Daryo” mazkur murojaat yuzasidan o‘rganish olib bordi.
Biz firibgarlik qurboni bo‘ldik. “Zohmir Group” nomli qurilish kompaniyasi tomonidan aldandik. Bu kompaniyaning reklamasiga chuv tushdik. Yangi uylarga investitsiya kiriting, yaxshi uylarga ega bo‘lasiz deyishganiga ularga ishonib, pullarimizni notarius orqali topshirgandik. Shartnomalar qilindi, kimdir pulini bank orqali to‘ladi, yana kimdir notarius orqali qarz shartnomalari qilib, naqd shaklda to‘lov qildi. Yana boshqa birov qurilish mollariga pul tikib, uyga shu tarzda investitsiya kiritdi, — deydi qurilish tashkilotiga aldanganini aytgan Avaz Yormuhammedov.
Murojaatchining ma’lum qilishicha, qurilayotgan uyning oldi-sotdi qilish shartnomasi 2020-yil tuzilgan bo‘lib, u 2 xonali uyga 190 million (o‘sha paytdagi qiymatga ko‘ra, 17 ming dollar) to‘lagan.
Qurilish tashkiloti bizga va’da qilgan uylarni 2022-yilning may-iyun oyida topshirishi kerak edi. Lekin 2023-yil keldi hamki, uy qurilishi qanday holatda bo‘lsa, shunday turibdi. Hech narsa o‘zgarmagan. Biz aytilgan muddatdan o‘tgach, quruvchidan uyimiz qani, qachon tayyor bo‘ladi deb so‘raganimizdan so‘ng, boshqa qiziq-qiziq muammolar paydo bo‘lmoqda. Aniqlanishicha, bizga sotilgan uylar yana 4-5 kishiga sotilgan ekan — deydi murojaatchi.
Suhbatdoshning aniqlashtirishicha, quruvchi 9 ta xonadonni 30 kishiga sotgan.
30 kishi bilan ham shu uy sizniki deb, shartnoma qilingan. Pullari olingan. Biz bu haqda shu manzilga qatnayverib, uy xaridorlari bir-birimizni ko‘rib, gaplashganimizdan so‘ng bildik, — deydi fuqaro.
Aldanganini aytayotgan fuqarolarning bildirishicha, ulardan Aziz Aliyev ismli mas’ul pullarni sanab olgan.
Pullarimizni Aziz Aliyev ismli kishi olgandi. Keyin bilsak, ular ko‘pchilik ekan. Ular uyushgan guruh tuzib, pullarimizni boshqa sohaga ishlatib yuborishganmi, bizdan qochib yurishibdi. Ularni topolmayapmiz. Shu sabab Ichki ishlarga, prokuraturaga murojaat qildik. Hozircha tergov ishlari ketyapti degan javobni olyapmiz, — deydi suhbatdosh.
Pul to‘lab uy ololmayotgan yana bir fuqaro Ibrohim Rayimboyevning aytishicha, u 2 xonali uy uchun 25 ming dollar pulni oldindan to‘lagan.
Bu uylarning qurilishi aslida 2018-yil boshlangan ekan. Bu uyning asl egasi Aleksandr Kulik ismli fuqaro bo‘lgan. Keyinchalik qurilishda muammolar bo‘lgani sabab “Zohmir Group” MCHJ egasi bilan kelishib, oldi-sotdi shartnoma qilishgan ekan. “Zohmir Group” MCHJ keyinchalik bu xonadonlarni 39 kishiga sotgan ekan. Barchasiga shartnoma qilib, aldov yo‘li bilan pullarini o‘zlashtirgan. Shaxsan o‘zim 2 xonali uy uchun 2021-yilning iyun oyida to‘liq 25 ming dollar pul to‘lab qo‘yganman. Aslida bu uy qurilayotgan yer ham oldingi egasi nomida ekan. Uch yildan beri binoda umuman o‘zgarish yo‘q. Qanday chala holatda bo‘lsa, xuddi shu holatda turibdi. Faqat tomi yopildi xolos, — deydi Ibrohim Rayimboyev.
Aldanganini aytayotgan fuqaroning bildirishicha, u uyga to‘lov qilganidan so‘ng, har hafta quruvchiga telefon qilib, uy qachon bitishi bilan qiziqqan.
Har hafta telefon qilsam, bugun gazni hal qilamiz, ertaga kadastrni hal qilyapmiz deb har safar bahona qilardi. Ertaga uchrashaylik, kadastr hujjatlarini ko‘rsataman deb, yo‘q bo‘lib ketardi. 2021-yilning iyun oyida uyga to‘lov qilayotganimda uyni sentabr, uzog‘i bilan dekabr oyida tugatib, hujjatlashtirib beramiz degandi. Ammo hozirgi kungacha natija yo‘q, — deydi u.
.jpg)
Murojaatchi Avaz Yormuhammedovning aytishicha, mazkur qurilish kompaniyasidan uy olish niyatida to‘lov qilgan fuqarolar uy olish uchun yashab turgan xonadonlarini ham sotgan. Va ayni kunda ko‘chada qolmoqda.
2022-yilning 24-mart kuni MCHJ rahbariga uy uchun to‘lov qilganmiz. O‘sha yilning iyul oyida uyni topshiramiz deyishgandi. Lekin 2023-yil yakunlanyaptiki, uydan darak yo‘q. Masalan men to‘lov qilgan 20-uyning 3-xonadonini 5 kishiga sotgan. Qolgan xonadonlar ham shu holatda. Bu yerda firibgarlik bo‘lyapti. Firibgarlik haqida 2022-yilning avgust oyida xabar topgandim. O‘shanda pulimni qaytaring deganimda, haligacha qaytarib berishmadi, — deydi yana bir murojaatchi Zufarbek Sattorov.
“Daryo” jurnalisti mazkur muammo yuzasidan fuqarolarni aldagani aytilayotgan Aziz Aliyev bilan suhbatlashdi. U bugungi kunga kelib, undan norozi bo‘lgan fuqarolarning pullarini qaytarib berayotganini aytmoqda.
Bu uyimiz aslida 5 qavatli bo‘lishi kerak edi. Biz uni 3 qavat qilib qurdik. Uyning qavatlari soni o‘zgargach, loyihani o‘zgartirdik. Shu sabab fuqarolarning pullarini vaqtida qaytarib berolmadik. Ayni kunga kelib, ko‘pchiligining pulini qaytarib berdik, — deydi Aziz Aliyev jurnalist bilan telefon orqali muloqotida.
Qurilish tashkiloti rahbari 39 kishidan pul olganini, anchasiga mablag‘i qaytarilganini tasdiqladi. Ammo 9 ta xonadon 39 kishiga sotilganini rad etdi.
Farhod aka, Sayfullo akalarning pullarini qaytarib berdik. Qolganlarning pulini ham sekin-asta qaytarib beryapmiz, — deydi chala qolgan uy qurilishiga mas’ul.
Uy-joy uchun Aziz Aliyevga naqd pul to‘lagan fuqarolar notarius orqali buni tasdiqlatib, qarz shartnomasi tuzilganini bildirdi. “Daryo”ning bu haqdagi savollariga javob qaytargan notarius qarz shartnomasi fuqarolarning uy uchun to‘lov qilganini tasdiqlab, pullarning qachon qaytarilishi ham ko‘rsatilganini aytdi.
Fuqarolarning pul bergani qarz shartnomasi orqali tasdiqlanadi. Va bu pullar qachon qaytarilishi lozimligi ham shartnomada ko‘rsatilgan bo‘ladi. Pul oldi-berdisi notarius orqali tasdiqlangani fuqarolarning yutug‘i bo‘lgan aslida, — deydi “Daryo” jurnalisti bilan suhbatlashgan notarius.
“Daryo” voqealar rivojini kuzatishda davom etadi.
Izoh (0)