Qashqadaryoda qurilishi boshlab yuborilgan, ayni kunga qadar uchinchi qavatigacha ko‘tarilgan 19 ta ko‘p qavatli uy tender savdosiga qo‘yildi va talabgor quruvchi izlanmoqda. Holbuki, mazkur uylar quruvchisi aniq.
Bu haqda “Daryo”ga ma’lum qilgan quruvchining ta’kidlashicha, viloyatda o‘tkazilgan tender savdosi shunchaki ko‘zbo‘yamachilik bo‘lib, natijasi mas’ullarga oldindan ma’lum bo‘lgan.
“2020-yil yanvar oyida respublika gazetalarining birida uy-joylarni qurish bo‘yicha tender savdosi e’lon qilindi. Mazkur e’longa ko‘ra, joriy yil Qashqadaryo viloyatining qishloq hududlarida 47 ta ko‘p qavatli arzon uy-joylar qurilishi belgilangan. Ajablanarlisi, tender natijalari ayni kunga qadar e’lon qilinmagan bo‘lsa-da, viloyatda 19 ta uy qurilishi boshlab yuborilgan. Va aksariyat to‘rt qavatli uylarning uch qavati ko‘tarilgan. Demakki, hali natijasi e’lon qilinmagan tender taqdiri mas’ullarga ma’lum bo‘lgan”, — deydi shaxsini ochiqlashni istamagan quruvchi.
Qashqadaryo prokurorining birinchi o‘rinbosari Sherali Ashirov imzolagan xatda 19 ta ko‘p qavatli uy qurilishi “Qishloqqurilishinvest”ning viloyat filiali buyurtamasi bilan tanlov savdolari o‘tkazilmagan holda boshlab yuborilganligi tasdiqlanadi.
Mazkur uylar qurilishi to‘xtatilgani yoziladi.
Qurilish sohasida hududiy nazorat inspeksiyasi boshlig‘i Ismoil Qo‘ziyev ham “Daryo” muxbiri bilan muloqotda viloyatda tender natijasi e’lon qilinmasdan qurilish ishlari boshlab yuborilganligini tan oldi.
“Shuning uchun ham o‘zboshimchalik qilgan quruvchi tashkilotlar ustidan sudga shikoyat qildik. Adashmasam, sud ham ularga jarima berdi”, — deydi Ismoil Qo‘ziyev.
Ismoil Qo‘ziyevning ta’kidlashicha, “Qishloqqurilishinvest”ning viloyat filiali buyurtmasiga asosan, uy qurishni boshlab yuborgan quruvchilar tadbirkor, shu boisdan ham mazkur tashkilot quruvchilarning o‘zboshimchaligiga jim qarab turishga majbur.
“Ular tadbirkor, tadbirkor ishiga to‘g‘ridan to‘g‘ri kirolmaymiz, Vazirlar Mahkamasi huzurida tadbirkorlar huquqini himoya qiluvchi Ombudsman bor, ularning ruxsati bilan kirishimiz mumkin. Biz holat bo‘yicha olgan ma’lumotlarimiz asosida sudga murojaat qildik va sud hukmiga topshirdik”, — deydi Ismoil Qo‘ziyev.
Ismoil Qo‘ziyev viloyatda noqonuniy qurilgan uy-joylar soni 19 ta emas, ayni kunda 6-7 taga yetishini ta’kidlab, ushbu uylarning texnik va mualliflik nazorati o‘tkazilmaganligini qo‘shimcha qildi.
Mazkur uy-joylar qurilishida qo‘llanilayotgan qurilish materiallari va buyumlarining shaharsozlik normalari hamda qoidalariga qay darajada mos kelishi hamda standartlariga rioya etilishi ustidan nazorat o‘rnatilmaganligi inobatga olinsa, demakki, mazkur uy-joylar aholi yashashi uchun talabga javob berish-bermasligi ham so‘roq ostida qoladi.
“Noqonuniy qurilgan uy-joylar ustidan nazorat hokimliklar zimmasida bo‘lishi kerak”, — deydi hududiy nazorat inspeksiyasi boshlig‘i.
“Qishloqqurilishinvest” Qashqadaryo viloyat filiali direktori Qo‘yli Narzullayevning ma’lumot berishicha, 2020-yil viloyatda haqiqatdan ham 47 ta ko‘p qavatli arzon uy-joylar qurilishi belgilangan bo‘lib, mazkur uy-joylarning 45 tasi to‘rt qavatli, 2 tasi besh qavatli qilib quriladi.
Qo‘yli Narzullayev shartnomasiz qurilishi boshlab yuborilgan ko‘p qavatli uylar Prezident maslahatchisi xatiga ko‘ra boshlanganini ta’kidlar ekan, qurilishi boshlangan uy-joylarning tender savdosiga qo‘yilishini izohlay olmadi.
“Qurilishi boshlangan va quruvchisi ham aniq bo‘lgan obyektlar tender savdosiga kiritilgach, bizga o‘xshagan quruvchilar umid qilib tenderga kirib, natijasiz chiqishimizga sabab bo‘ladi-ku. Bu esa tender savdolariga nisbatan ishonchsizlik uyg‘otadi”, — deydi murojaatchi fuqaro “Daryo” muxbiri bilan suhbati davomida.
Qo‘yli Narzullayev mazkur xatti-harakatini Prezident maslahatchisi T.Xudaybergenovning bosh vazir A.Aripovga yo‘llagan xati bilan asoslashga urinsa-da, mazkur xatda 2019-yil uchun qo‘shimcha uy-joy qurilishi lozimligi va aynan Qashqadaryoda 20 ta, jumladan, Qarshi tumanida 1 ta uy-joyga ehtiyoj borligi ta’kidlanadi. Kuzatuvlarimizga ko‘ra, Qarshi tumanida 3 ta ko‘p qavatli uy-joy tendersiz qurilayotgani ma’lum bo‘ldi.
Qarshi tumanining Saxtapiyoz hududida 2 ta to‘rt qavatli uy qad rostlayotgan bo‘lib, birini “Asl kafolat temir beton buyumlari” MChJ, ikkinchisini esa “Behruz Shuhratovich” xususiy korxonasi qurayotgani ma’lum bo‘ldi. Rovot massividagi uyni esa “Akbar Alyans Nur” MChJ vakillari qurayotgani oydinlashdi. Shuningdek, Qarshi shahrining “Cho‘lquvar” va “Roguzar” mahallalarida ham 5 qavatli uylar qurilishi boshlab yuborilganiga guvoh bo‘ldik.
Mazkur voqealar Qashqadaryo prokuraturasiga ma’lum bo‘lsa-da, hozircha bu haqda rasmiy ma’lumot berilmadi.
Izoh (0)