Janubiy Koreya kompaniyasi O‘zbekistonda IT taʼlimni rivojlantirish maqsadida “Smart class” xonalarini tashkil etish taklifini bildirmoqda.
Maʼlum qilinishicha, raqamli texnologiyalar vaziri Sherzod Shermatov Janubiy Koreyaning “Hancom Group” kompaniyasi raisi o‘rinbosari Sonjun Byon boshchiligidagi delegatsiya bilan uchrashuv o‘tkazdi.
Uchrashuvda Janubiy Koreya va O‘zbekiston o‘rtasidagi hamkorlik yuqori baholandi. IT sohasini rivojlantirish, ikki mamlakat o‘rtasidagi munosabatlarni yanada yaxshilash maqsadida Inha universiteti tashkil etilgani, ushbu oliy taʼlim muassasasidan har yili ko‘plab mutaxassislar yetishib chiqayotgani taʼkidlandi.
Janubiy Koreya tomoni kompaniya haqida maʼlumot berib, tashkilot dasturiy mahsulotlar ishlab chiqarish bo‘yicha Koreyada yetakchi o‘rinda turishini, bundan tashqari, 30 dan ortiq boshqa yo‘nalishlarda ham faoliyat olib borishini maʼlum qildi. Kompaniya vakili, shuningdek, O‘zbekistonda IT taʼlimni rivojlantirish maqsadida “Smart class” zamonaviy xonalarini tashkil etish va unda dasturlash hamda sunʼiy intellekt yo‘nalishlarida taʼlim olib borish bo‘yicha o‘z takliflarini bildirdi.
O‘zbekiston tomoni mamlakatni mintaqaviy IT xabga aylantirish asosiy maqsad ekanini qayd etgan holda, mazkur taklifni unga hamohang tarzda amalga oshirish mumkinligini bildirdi. Bu o‘z navbatida, o‘zbek yoshlarini chetga chiqmagan holda yuqori maoshli ish bilan taʼminlash va IT xizmatlar eksportini oshirishga xizmat qiladi.
Bundan tashqari, “Hancom Group” kompaniyasi IT Park rezidenti bo‘lishga taklif etilib, undagi soliq imtiyozlari haqida maʼlumot berildi hamda kompaniya bilan hamkorlikda ishlash ikki tomon uchun ham foydali bo‘lishi maʼlum qilindi.
Izoh (0)