Жанубий Корея компанияси Ўзбекистонда IT таълимни ривожлантириш мақсадида “Smart class” хоналарини ташкил этиш таклифини билдирмоқда.
Маълум қилинишича, рақамли технологиялар вазири Шерзод Шерматов Жанубий Кореянинг “Hancom Group” компанияси раиси ўринбосари Сонжун Бён бошчилигидаги делегация билан учрашув ўтказди.
Учрашувда Жанубий Корея ва Ўзбекистон ўртасидаги ҳамкорлик юқори баҳоланди. IT соҳасини ривожлантириш, икки мамлакат ўртасидаги муносабатларни янада яхшилаш мақсадида Инҳа университети ташкил этилгани, ушбу олий таълим муассасасидан ҳар йили кўплаб мутахассислар етишиб чиқаётгани таъкидланди.
Жанубий Корея томони компания ҳақида маълумот бериб, ташкилот дастурий маҳсулотлар ишлаб чиқариш бўйича Кореяда етакчи ўринда туришини, бундан ташқари, 30 дан ортиқ бошқа йўналишларда ҳам фаолият олиб боришини маълум қилди. Компания вакили, шунингдек, Ўзбекистонда IT таълимни ривожлантириш мақсадида “Smart class” замонавий хоналарини ташкил этиш ва унда дастурлаш ҳамда сунъий интеллект йўналишларида таълим олиб бориш бўйича ўз таклифларини билдирди.
Ўзбекистон томони мамлакатни минтақавий IT хабга айлантириш асосий мақсад эканини қайд этган ҳолда, мазкур таклифни унга ҳамоҳанг тарзда амалга ошириш мумкинлигини билдирди. Бу ўз навбатида, ўзбек ёшларини четга чиқмаган ҳолда юқори маошли иш билан таъминлаш ва IT хизматлар экспортини оширишга хизмат қилади.
Бундан ташқари, “Hancom Group” компанияси IT Park резиденти бўлишга таклиф этилиб, ундаги солиқ имтиёзлари ҳақида маълумот берилди ҳамда компания билан ҳамкорликда ишлаш икки томон учун ҳам фойдали бўлиши маълум қилинди.
Изоҳ (0)