Ijtimoiy tarmoqlarda Amudaryoning quyi oqimi aks etgan surat ko‘rsatilib, daryoning suvi qurib qolgani aytilgan xabar tarqalgan edi.
“Holat juda chatoq, ekspertlarning aytishicha, yaqin yillarda O‘rta Osiyo xalqlarining katta qismi uylarini tashlab chiqib ketishadi. Qurg‘oqchilik ketidan ocharchilik kelishi tabiiy holat, suv uchun urush bo‘lishi kutilmoqda”, — deyilgan tarqalgan xabarda.
Mazkur xabar yuzasidan Amudaryo suv xo‘jaligi birlashmasi “Daryo”ga izoh berdi.
“Joriy 2023-yilgi sug‘orish davri tugaganligi sababli Tuyamo‘yin suv omboridan Amudaryoning quyi oqimiga sanitar suv qoldirilib, suv qisqartirilgan. Tuyamo'yin suv omboriga kelasi yil uchun suv yig'ish boshlangan”, — deyiladi birlashma izohida.
Qo‘shimcha qilinishicha, surat Tuyamo‘yin suv omborining pastki qismida, yaʼni suv sathi tushgan joydan olingan bo‘lishi mumkin.
Maʼlumot uchun, Tuyamo‘yin suv ombori Amudaryoning quyi oqimidagi Tuyamo‘yin tor darasida qurilgan yirik gidrotexnika inshootidir. Daryo suvini irrigatsiya va energetika maqsadlarida mavsumiy rostlash uchun xizmat qiladi.
Izoh (0)