Амударёда сув сатҳининг пасайиши Қашқадарё вилоятида ичимлик суви тақчиллигига сабаб бўла олмайди. Бу ҳақда “Қашқадарё сув таъминоти” МЧЖ директори Бекзод Шоимов иштирокида журналист ва блогерлар учун ташкил қилинган матбуот анжуманида гапирилган.
Матбуот анжуманида қатнашган блогер Намоз Чориевнинг “Дарё”га билдиришича, мулоқотда сўз олган журналист Нуриддин Эгамов масъулларга юзланиб, “Амударё ҳавзасида сув сатҳининг камайиши Қашқадарёда сув тақчиллигига сабаб бўладими?”, — дея савол берган.
Жамият директори Бекзод Шоимов ва масъуллар журналист саволига жавоб қайтариб, “Қишлоқ хўжалиги соҳасида муаммо бўлиши мумкин. Бироқ ичимлик сувига таъсирини ўтказмайди”, деб жавоб берган.
Толимаржон сув омборидан олаётган сувимиз ҳажми унчалик катта эмас. Сув омборидан олинадиган сув 10 миллион метр/куб атрофида бўлади. Хулоса қилинганда, бундан хавотиримиз йўқ. Қишлоқ хўжалиги соҳасида қандайдир муаммолар кузатилиши мумкин. Бироқ бу ичимлик сувига ўз таъсирини ўтказмайди. Сувимиз етарли”, — дейди жамият директорининг ўринбосари Тўлқин Ёқубов.
Масъулларнинг қўшимча қилишича, табиий омиллар, яъни ёғингарчилик ҳолати ҳам соҳада муҳим аҳамият касб этади.
.jpg)
Ўтган ёз фаслида ёғингарчилик яхши бўлмади. Натижада баъзи қудуқларимизда сув сатҳи 5-10 метрга пастлаб кетди. Бу эса ортиқча харажатларга сабаб бўлади, — дейди масъуллар.
Аввалроқ 2050 йилгача Сирдарё ҳавзасида сув ресурси 5 фоизга, Амударё ҳавзасида 15 фоизгача камайиши кутилаётгани хабар берилганди.
Изоҳ (0)