FТ: АҚШ Россиянинг музлатилган активларини “халқаро қонунларга мувофиқ” мусодара қилиш йўлини топди

Ғарб давлатлари музлатилган Россия активларини Украина фойдасига мусодара қилиш бўйича музокараларни фаоллаштирди. Бу ҳақда Financial Times ёзмоқда.

Нашрнинг таъкидлашича, сўнгги ҳафталарда Қўшма Штатлар хусусий музокараларда мусодара масалалари бўйича тобора қатъий позицияни эгаллаб, G7 йиғилишларида буни “халқаро қонунларга мувофиқ” амалга ошириш йўли борлигини таъкидлаган.

Исми ошкор этилмаган амалдорнинг FТга айтишича, Вашингтондагилар активларни мусодара қилиш бўйича қарор яқин орада орада қабул қилиниши мумкин, деган фикрда. Унинг сўзларига кўра, бу масала G7 етакчиларининг урушнинг икки йиллигига тўғри келадиган учрашувида муҳокама қилиниши мумкин.

FТ мусодара қилиш ғояси Европа Иттифоқи ва АҚШдаги сиёсий келишмовчиликлар фонида фаолроқ муҳокама қилина бошлаганига эътибор қаратди — баҳслар натижасида сўнгги ҳафталарда Украинага ўнлаб миллиард долларлик ёрдам ажратиш тўхтатилган.

Ғарб давлатларида Россия Марказий банкига тегишли деярли 300 миллиард доллар музлатиб қўйилганди. Уларнинг аксарияти Европада.

2023 йилнинг ёзида Европа Иттифоқи ишчи гуруҳи ушбу активларни ҳибсга олишнинг қонуний йўли йўқ деган хулосага келди. Шундан сўнг, Европа Иттифоқи музлатилган маблағларни қайта инвестиция қилиш имкониятларини ўрганишга киришди, бу чора пулларни Украинани қайта тиклашга ўтказиш учун керак.

14 декабрь куни Европа Иттифоқи Украинага 50 миллиард доллар ёрдам ажратиш бўйича якдил қарорга кела олмади. Бунга Венгрия вето қўйди.

АҚШда икки ойдан бери Украинага 60 миллиард доллар ўтказиш ҳақида баҳс-мунозаралар давом этмоқда. Жо Байден маъмурияти буни ёқласа, Конгрессдаги республикачилар қонун лойиҳасини қўллаб-қувватлашдан бош тортмоқда.