London meri Sodiq Xon shaharning “Ulez” dasturi doirasida utilizatsiya qilinadigan mashinalarni Ukrainaga jo‘natish rejasini blokladi. Bu haqda The Telegraph yozmoqda.
Sentyabr oyida Kiyev meri Vitaliy Klichko avtomobillarning bir qismini Ukrainaga berishni so‘ragandi. Uning so‘zlariga ko‘ra, bu yordam “katta potensial” berar edi, transport vositalaridan esa “turli xil qutqaruv va transport funksiyalarida” foydalanish mumkin edi.
Xon dekabr boshida Klichkoga javob xati yozgan. U Kiyev meriga so‘rovni rad etib, bunday yetkazib berish qonunga zid bo‘lishini, chunki “Ulez” dasturi londonliklar uchun “iqtisodiy, ijtimoiy va ekologik nuqtayi nazardan” foyda keltirishi kerakligini aytdi.
Ma’lumot uchun, “Ulez” dasturi Londonning uglerod chiqindilarini kamaytirishga qaratilgan chora. Uning doirasida shahar aholisi maʼlum ekologik talablarga javob bermaydigan avtomobillarni – asosan yo‘ltanlamas va pikaplarni o‘z ixtiyori bilan utilizatsiyaga topshirsa, 2000 funt sterling olishi mumkin. Aks holda ular kuniga 12,50 funt sterling to‘lashi kerak bo‘ladi.
Xonning qarori muxolifatdagi Konservativ partiya va Ukrainaga yordam berishda ishtirok etgan ko‘ngilli tashkilotlar tomonidan allaqachon tanqid qilingan.
London meri uchun may oyida bo‘lib o‘tadigan saylovga konservativ nomzod Syuzan Holl so‘rovni rad etishni “bema’nilik” deb atadi hamda Ukrainaga yordam “barcha londonliklar va jahon hamjamiyatining manfaatlariga mos kelishini” ta’kidladi. Hollga yaqin manbalarning aytishicha, agar u saylansa, Ukrainaga mashinalarni berish uchun qonunni o‘zgartirmoqchi.
Izoh (0)