Tesla kompaniyasi AQSH Milliy Yo‘l harakati xavfsizligi boshqarmasi (NHTSA) talabiga ko‘ra, ikki milliondan ortiq elektromobilni chaqirib oladi. Bunga avtopilot — haydovchiga yordam tizimidagi muammolar sabab bo‘lmoqda, deb xabar berdi CNN.
NHTSA talabidan oldin avtopilot funksiyasi yoqilgan paytda sodir bo‘lgan bir qator baxtsiz hodisalar bo‘yicha ikki yillik tekshiruv o‘tkazilgandi, deb eslatdi telekanal.
Tekshiruv natijasida maʼlum bo‘lishicha, baʼzi avtomobil egalari avtopilot funksiyasidan noto‘g‘ri foydalanishgan, tizimning o‘zida esa undan noto‘g‘ri foydalanishga yo‘l qo‘ymaslik uchun zarur choralar bo‘lmagan.
Natijada Tesla haydovchilarni rulda ehtiyotkor bo‘lishga undovchi qo‘shimcha boshqaruv va ogohlantirishlarni o‘z ichiga olgan dasturiy ta’minotning yangilangan versiyasini chiqarishni rejalashtirmoqda, deyiladi kompaniya press-relizida.
Tesla aniqlik kiritishicha, AQSH va Kanadada chaqirib olinadigan elektromobillar egalaridan dilerlik markazlariga tashrif buyurish talab etilmaydi, yangilangan dasturiy ta’minot masofadan turib o‘rnatiladi.
2023-yil boshida Tesla o‘zining 300 000 dan ortiq Full Self-Driving haydovchiga yordam tizimi bilan jihozlangan mashinalarini chaqirib olgandi, chunki NHTSA tizim baxtsiz hodisalar xavfini oshiradi, degan xulosaga kelgan.
Izoh (0)