Nemis razvedkachisi Ukraina haqidagi maxfiy razvedka ma’lumotlarini Rossiya federal xavfsizlik xizmatiga 800 ming yevroga sotdi. U hozir sudlanmoqda, deya xabar berdi Bild.
Berlin Oliy sudi Germaniya Federal razvedka xizmatining xavfsizlik bo‘limiga rahbarlik qilgan 52 yoshli bundesver polkovnigi Karsten L. ustidan sud jarayonini boshladi. U davlatga xiyonat qilish va Rossiya maxsus xizmatlariga davlat sirlarini oshkor qilishda ayblanmoqda. U bilan birga olmos sotuvchisi va sobiq bundesver harbiysi Artur E. ham sudlanmoqda. Sud jarayoni kamida yozgacha davom etadi. Shu vaqt ichida 51 ta sud yig‘ilishi o‘tkazilishi rejalashtirilgan. Ishga 40 jildlik hujjatlar jalb qilingan.
Tergov maʼlumotlariga ko‘ra, ayblanuvchi Ukrainadagi urush haqidagi asosiy razvedka maʼlumotlarini FSBga sotgan. Buning uchun ular 800 ming yevrodan ko‘proq pul olgan. Germaniya Federal razvedka xizmatining xavfsizlik bo‘limi buni mamlakat tarixidagi eng og‘ir xoinlik holatlaridan biri deb hisoblaydi, yetkazilgan zararni o‘lchash mumkin emas.
Ular bir hafta davomida do‘st davlatning razvedka xizmatlaridan kelgan ma’lumotlarni yig‘gan. Spiegel ma’lumotlariga ko‘ra, Karsten L. dastlab “Vagner” yollanma askarlarining yopiq suhbatiga kirish imkoniga ega bo‘lib, skrinshotlarni olib, FSBga topshirgan. Keyin u ichki razvedka suhbatlarining 73 sahifali skrinshotlarini ham olgan. Artur E. ularni Moskvaga olib borgan va buning uchun pul olgan.
Izoh (0)