Немис разведкачиси Украина ҳақидаги махфий разведка маълумотларини Россия федерал хавфсизлик хизматига 800 минг еврога сотди. У ҳозир судланмоқда, дея хабар берди Bild.
Берлин Олий суди Германия Федерал разведка хизматининг хавфсизлик бўлимига раҳбарлик қилган 52 ёшли бундесвер полковниги Карстен Л. устидан суд жараёнини бошлади. У давлатга хиёнат қилиш ва Россия махсус хизматларига давлат сирларини ошкор қилишда айбланмоқда. У билан бирга олмос сотувчиси ва собиқ бундесвер ҳарбийси Артур Э. ҳам судланмоқда. Суд жараёни камида ёзгача давом этади. Шу вақт ичида 51 та суд йиғилиши ўтказилиши режалаштирилган. Ишга 40 жилдлик ҳужжатлар жалб қилинган.
Тергов маълумотларига кўра, айбланувчи Украинадаги уруш ҳақидаги асосий разведка маълумотларини ФСБга сотган. Бунинг учун улар 800 минг евродан кўпроқ пул олган. Германия Федерал разведка хизматининг хавфсизлик бўлими буни мамлакат тарихидаги энг оғир хоинлик ҳолатларидан бири деб ҳисоблайди, етказилган зарарни ўлчаш мумкин эмас.
Улар бир ҳафта давомида дўст давлатнинг разведка хизматларидан келган маълумотларни йиғган. Spiegel маълумотларига кўра, Карстен Л. дастлаб “Вагнер” ёлланма аскарларининг ёпиқ суҳбатига кириш имконига эга бўлиб, скриншотларни олиб, ФСБга топширган. Кейин у ички разведка суҳбатларининг 73 саҳифали скриншотларини ҳам олган. Артур Э. уларни Москвага олиб борган ва бунинг учун пул олган.
Изоҳ (0)