Toshkent supermarketlarida Pokistondan olib kelingan joriy mavsumdagi mandarinlarning birinchi partiyasi sotuvda paydo bo‘ldi, deb xabar beradi EastFruit.
Ta’kidlanishicha, O‘zbekiston poytaxtidagi do‘konlarda sotilayotgan Pokiston mandarinlarining o‘rtacha narxi 1 kilogramm uchun 12,5 ming so‘mni tashkil etmoqda. Bu mamlakatda boshqa davlatlardan yetkazib beriladigan mandarinlardan 1,5 barobarga arzon demak.
Pokiston O‘zbekiston bozoriga ushbu mahsulotning eng yirik yetkazib beruvchisi hisoblanadi. So‘nggi bir necha yil davomida mamlakat o‘zbek bozoriga mandarin yetkazib berishni ko‘paytirib, bozordagi ulushini oshirib oldi.
2019-yildan 2022-yilgacha Pokiston tomonidan import qilingan mandarinlar hajmi 56 foizdan 80 foizgacha ko‘tarilgan bo‘lsa, Xitoyning ulushi 37 foizdan 9 foizga tushib ketgan.
2020-yilda koronavirus pandemiyasi davrida kuzatilgan pasayishdan keyin O‘zbekistonda mandarin importi hajmi nafaqat qayta tiklandi, balki sezilarli darajada oshdi. Ushbu mahsulot importi 2022-yilda ancha oshgan — o‘tgan yili mamlakatga 63,6 ming tonna mandarin import qilingan.
Eslatib o‘tamiz, 2022-yilning yanvar—noyabr oylarida O‘zbekiston 12 ta xorijiy davlatdan qiymati 11,4 million dollarga teng bo‘lgan mandarin import qilgan. Eng ko‘p mandarin import qilingan davlatlar ro‘yxatida Pokiston birinchi, Turkiya ikkinchi o‘rinda — 3,6 ming tonna. Mamlakatdan noyabrda 500 tonna mandarin olib kelingan.
Izoh (0)