Toshkent metropoliteni “Choshtepa” bekatida poyezdlarning belgilangan vaqtdan kechikishi kuzatilgani aytilgan xabarlarga munosabat bildirdi.
Ma’lum qilinishicha, 6-dekabr sanasi soat 08:55 lar atrofida “Choshtepa” bekatidan harakatlanishi lozim bo‘lgan 8-sonli harakat tarkibi poyezdda kuzatilgan texnik nosozlik tufayli harakatlana olmagan. Buning natijasida esa ortidan kelayotgan 14-sonli harakat tarkibi bekat band bo‘lgani sababli, bekat kirish svetofori oldida 5 daqiqa vaqt mobaynida to‘xtab turgan.
Nosozlik kuzatilgan harakat tarkibidagi yo‘lovchilar bekat platformasiga tushirilgan va bu harakat tarkibi 09:02 da tekshiruv yo‘lagi tomon yuborilgan.
“Hozirgi vaqtda yo‘nalishdagi poyezdlar belgilangan jadvalga asosan harakatlanmoqda. Keltirilgan noqulaylik yuzasidan yo‘lovchilardan uzr so‘raymiz”, — deyiladi munosabatda.
Oktyabr oxirlarida Toshkent metropolitenining “Shahriston” metro bekatida poyezd tarkibi texnik nosozlik sabab to‘xtab qolgandi. Noyabr boshlarida esa Toshkent metrosida unutib qoldirilgan buyum yana poyezdlarning kechikishiga sabab bo‘layotgani aytilgan edi.
Izoh (0)