Тошкент метрополитени “Чоштепа” бекатида поездларнинг белгиланган вақтдан кечикиши кузатилгани айтилган хабарларга муносабат билдирди.
Маълум қилинишича, 6 декабрь санаси соат 08:55 лар атрофида “Чоштепа” бекатидан ҳаракатланиши лозим бўлган 8-сонли ҳаракат таркиби поездда кузатилган техник носозлик туфайли ҳаракатлана олмаган. Бунинг натижасида эса ортидан келаётган 14-сонли ҳаракат таркиби бекат банд бўлгани сабабли, бекат кириш светофори олдида 5 дақиқа вақт мобайнида тўхтаб турган.
Носозлик кузатилган ҳаракат таркибидаги йўловчилар бекат платформасига туширилган ва бу ҳаракат таркиби 09:02 да текширув йўлаги томон юборилган.
“Ҳозирги вақтда йўналишдаги поездлар белгиланган жадвалга асосан ҳаракатланмоқда. Келтирилган ноқулайлик юзасидан йўловчилардан узр сўраймиз”, — дейилади муносабатда.
Октябрь охирларида Тошкент метрополитенининг “Шаҳристон” метро бекатида поезд таркиби техник носозлик сабаб тўхтаб қолганди. Ноябрь бошларида эса Тошкент метросида унутиб қолдирилган буюм яна поездларнинг кечикишига сабаб бўлаётгани айтилган эди.
Изоҳ (0)