Savdo-sanoat palatasi “Toshkent shahrida Xalqaro hunarmandchilik, badiiy sanʼat va dizayn institutini tashkil etish chora-tadbirlari to‘g‘risida”gi hukumat qarori loyihasini muhokamaga qo‘ydi.
Hujjat loyihasi bilan “Hunarmand” uyushmasi, Oliy taʼlim, fan va innovatsiyalar vazirligi ishtirokida Xalqaro hunarmandchilik, badiiy sanʼat va dizayn institutini tashkil etish to‘g‘risidagi taklifiga rozilik berilmoqda.
Quyidagilar institutning asosiy vazifalari va faoliyati yo‘nalishlari etib belgilanadi:
- hunarmandchilik yo‘nalishida oliy maʼlumotga ega kadrlarni tayyorlash, jumladan, “usta—shogird” anʼanalari asosida dual taʼlim tizimini keng joriy qilish;
- hunarmandchilikning anʼanaviy turlarini saqlab qolgan holda, zamon talablariga moslashtirish va rivojlantirish;
- hunarmandchilik hamda zamonaviy arxitektura, qurilish, dizayn, to‘qimachilik va boshqa sanoat sohalari o‘rtasida o‘zaro integratsiyani taʼminlash;
- usta-hunarmandlar tomonidan maktablarda amaliy saboq berish amaliyotini yo‘lga qo‘yishga uslubiy ko‘maklashish;
- hunarmandchilik sohasida amaliy va innovatsion tadqiqotlar hamda zamonaviy talablar asosida ilmiy va ilmiy-pedagogik kadrlar tayyorlash.
Institutda bakalavriat taʼlim yo‘nalishlari va magistratura mutaxassisliklariga qabul parametrlari respublika mehnat bozori ehtiyojlari hamda universitetning moddiy-texnik imkoniyatidan kelib chiqib, Oliy taʼlim, fan va innovatsiyalar vazirligi bilan kelishilgan holda institut tomonidan belgilanadi.
Institutga abituriyentlarni qabul qilish va bitiruvchilarni attestatsiyadan o‘tkazish “Hunarmand” uyushmasi hamda Oliy taʼlim, fan va innovatsiyalar vazirligi bilan kelishilgan holda institut tomonidan belgilanadigan talablar, tartib va muddatlarga muvofiq amalga oshiriladi.
Shartnoma shartlariga muvofiq, institut bitiruvchilariga oliy taʼlim to‘g‘risidagi hujjat sifatida tan olinadigan davlat tomonidan tasdiqlangan namunadagi diplom beriladi. Institut rektori muassis tomonidan lavozimga tayinlanadi va lavozimidan ozod qilinadi. Institutda talabalar o‘qishi uchun to‘lov-kontrakt mablag‘lari miqdori muassis tomonidan belgilanadi.
Avvalroq O‘zbekistonda prezident farmoni bilan yangi universitet tashkil etilishi, shuningdek, mamlakatda Buyuk Britaniya ta’lim dasturi asosidagi xalqaro maktab ochilishi to‘g‘risida xabar berilgandi.
Izoh (0)