Noyabr oxirlarida Urganch—Xiva—Urganch yo‘nalishida trolleybuslar harakati vaqtincha to‘xtatilgan edi. Transport vazirligining ma’lum qilishicha, ushbu yo‘nalishda hozirda trolleybuslar yo‘lovchilarga xizmat ko‘rsatmoqda.
![](/static/2023/Fozilbek/photo_2023-11-29_17-07-19.jpg)
Ma’lum qilinishicha, Xorazm viloyati hokimligi Trolleybus boshqarmasiga qarashli yuqori kuchlanishli elektr simlari va transformatorlarida tegishli ta’mirlash ishlari olib borilayotgani sababli 2023-yilning 20-noyabridan Urganch—Xiva—Urganch yo‘nalishida harakatlanuvchi trolleybuslar harakati vaqtincha to‘xtatilgan.
“Xorazm trolleybus boshqarmasi” DK tomonidan 30-noyabrdan yuqoridagi yo‘nalishda trolleybuslar harakati qayta tiklanib, yo‘lovchilarga xizmat ko‘rsatish boshlangan.
Mazkur yo‘nalishda 8 ta harakat tarkibi tonggi 06:45 dan 18:45 ga qadar yo‘lovchilarga xizmat ko‘rsatmoqda.
Ta’kidlash kerakki, bu mamlakatda faoliyat ko‘rsatayotgan yagona trolleybus yo‘nalishi hisoblanadi. 1999-yilda Samarqand, Namangan, Andijon, Buxoro, Farg‘ona, Nukus, Marg‘ilon, Termiz va boshqa shaharlardagi trolleybuslar tarmog‘ining uzunligi 767,5 kilometrni tashkil etgan. O‘sha yilda mamlakatda 533 ta trolleybus bo‘lgan.