Ноябрь охирларида Урганч—Хива—Урганч йўналишида троллейбуслар ҳаракати вақтинча тўхтатилган эди. Транспорт вазирлигининг маълум қилишича, ушбу йўналишда ҳозирда троллейбуслар йўловчиларга хизмат кўрсатмоқда.
Маълум қилинишича, Хоразм вилояти ҳокимлиги Троллейбус бошқармасига қарашли юқори кучланишли электр симлари ва трансформаторларида тегишли таъмирлаш ишлари олиб борилаётгани сабабли 2023 йилнинг 20 ноябридан Урганч—Хива—Урганч йўналишида ҳаракатланувчи троллейбуслар ҳаракати вақтинча тўхтатилган.
“Хоразм троллейбус бошқармаси” ДК томонидан 30 ноябрдан юқоридаги йўналишда троллейбуслар ҳаракати қайта тикланиб, йўловчиларга хизмат кўрсатиш бошланган.
Мазкур йўналишда 8 та ҳаракат таркиби тонгги 06:45 дан 18:45 га қадар йўловчиларга хизмат кўрсатмоқда.
Таъкидлаш керакки, бу мамлакатда фаолият кўрсатаётган ягона троллейбус йўналиши ҳисобланади. 1999 йилда Самарқанд, Наманган, Андижон, Бухоро, Фарғона, Нукус, Марғилон, Термиз ва бошқа шаҳарлардаги троллейбуслар тармоғининг узунлиги 767,5 километрни ташкил этган. Ўша йилда мамлакатда 533 та троллейбус бўлган.
Изоҳ (0)