Bugun, 30-noyabr kuni Toshkent shahrida o‘z ishini boshlagan Barqaror rivojlanish maqsadlariga erishishda parlamentlararo hamkorlik bo‘yicha II global forumda Oliy Majlis Senati raisi Tanzila Norboyeva kirish so‘zida ushbu siyosiy forum mamlakatlarning erishgan natijalarini xalqaro hamjamiyatga yetkazishda, o‘zaro tajriba almashishda muhim muloqot maydoni bo‘lib xizmat qilayotganini aytib o‘tdi, deya xabar bermoqda “Daryo” muxbiri.
O‘tgan qisqa davr mobaynida O‘zbekistonda Barqaror rivojlanish maqsadlariga erishish bo‘yicha boshqa joyda uchramaydigan tajriba hamda unikal tizim joriy etildi.
Avvalo Hukumat aʼzolari tarkibida Muvofiqlashtiruvchi kengash tashkil etildi.
Global barqaror rivojlanish maqsad va vazifalari hamda ularning indikatorlari milliy xususiyatlarimizga moslashtirilib, 16 ta maqsad, 125 ta vazifa va 206 ta indikator qabul qilindi.
Muvofiqlashtiruvchi kengashning asosiy vazifasi – milliy maqsad va vazifalarni amalga oshirish bo‘yicha masʼul vazirlik hamda idoralarning samarali ishlarini tashkil etish, maqsadlarga erishishda idoralararo uyg‘unlikni taʼminlash etib belgilandi, — dedi Tanzila Norboyeva.
Senat raisining taʼkidlashicha, barqaror rivojlanishning zarur sharti bo‘lgan gender tenglikni taʼminlash, samarali bandlikni oshirish hamda aholini munosib ish bilan taʼminlash, barqaror infratuzilmani yaratish bo‘yicha ham keng ko‘lamli choralar ko‘rilmoqda.
Albatta bugungi natijalar bizga kifoya, shu bilan qanoatlanib qolamiz degan fikrdan yiroqmiz. Oldimizda hali turgan vazifalar yetarlicha.
Ayniqsa fuqarolik jamiyat institutlarining rivojlanish darajasi hali bizni qoniqtirmaydi. Milliy maqsadlarga erishishda, jamiyatdagi masʼuliyat va safarbarlik hissini yanada kuchaytirishimiz lozim. Xususan, BMT Bosh kotibi Antoniu Guterrish taʼkidlaganidek, fuqarolik jamiyati va xususiy sektor vakillari Barqaror rivojlanish maqsadlariga erishish yo‘lida kurashga safarbar bo‘lishlari kerak.
O‘zbekistonda barqaror rivojlanish doirasida o‘tkazilayotgan tadbirlar ham eng avvalo ushbu maqsadlarga yo‘naltirilgan, — dedi Norboyeva xonim.
Forum o‘z ishida davom etmoqda.
Izoh (0)