Бугун, 30 ноябрь куни Тошкент шаҳрида ўз ишини бошлаган Барқарор ривожланиш мақсадларига эришишда парламентлараро ҳамкорлик бўйича II глобал форумда Олий Мажлис Сенати раиси Танзила Норбоева кириш сўзида ушбу сиёсий форум мамлакатларнинг эришган натижаларини халқаро ҳамжамиятга етказишда, ўзаро тажриба алмашишда муҳим мулоқот майдони бўлиб хизмат қилаётганини айтиб ўтди, дея хабар бермоқда “Дарё” мухбири.
Ўтган қисқа давр мобайнида Ўзбекистонда Барқарор ривожланиш мақсадларига эришиш бўйича бошқа жойда учрамайдиган тажриба ҳамда уникал тизим жорий этилди.
Аввало Ҳукумат аъзолари таркибида Мувофиқлаштирувчи кенгаш ташкил этилди.
Глобал барқарор ривожланиш мақсад ва вазифалари ҳамда уларнинг индикаторлари миллий хусусиятларимизга мослаштирилиб, 16 та мақсад, 125 та вазифа ва 206 та индикатор қабул қилинди.
Мувофиқлаштирувчи кенгашнинг асосий вазифаси – миллий мақсад ва вазифаларни амалга ошириш бўйича масъул вазирлик ҳамда идораларнинг самарали ишларини ташкил этиш, мақсадларга эришишда идоралараро уйғунликни таъминлаш этиб белгиланди, — деди Танзила Норбоева.
Сенат раисининг таъкидлашича, барқарор ривожланишнинг зарур шарти бўлган гендер тенгликни таъминлаш, самарали бандликни ошириш ҳамда аҳолини муносиб иш билан таъминлаш, барқарор инфратузилмани яратиш бўйича ҳам кенг кўламли чоралар кўрилмоқда.
Албатта бугунги натижалар бизга кифоя, шу билан қаноатланиб қоламиз деган фикрдан йироқмиз. Олдимизда ҳали турган вазифалар етарлича.
Айниқса фуқаролик жамият институтларининг ривожланиш даражаси ҳали бизни қониқтирмайди. Миллий мақсадларга эришишда, жамиятдаги масъулият ва сафарбарлик ҳиссини янада кучайтиришимиз лозим. Хусусан, БМТ Бош котиби Антониу Гутерриш таъкидлаганидек, фуқаролик жамияти ва хусусий сектор вакиллари Барқарор ривожланиш мақсадларига эришиш йўлида курашга сафарбар бўлишлари керак.
Ўзбекистонда барқарор ривожланиш доирасида ўтказилаётган тадбирлар ҳам энг аввало ушбу мақсадларга йўналтирилган, — деди Норбоева хоним.
Форум ўз ишида давом этмоқда.
Изоҳ (0)