UFC so‘nggi yillarda geografiyasini kengaytirishda davom etmoqda. Yangi mamlakatlarda turnirlar o‘tkazilmoqda, sportchilar soni esa yildan yilga ortib bormoqda. O‘tgan yili Saudiya Arabistoni ko‘magida tashkil etilgan Riyadh Season Noche tadbiri kutilganidan ham yuqori darajada o‘tdi. Endi esa liga prezidenti Dana Uayt yangi, yanada kutilmagan hududni, ya’ni jangni bevosita Oq uy hududida o‘tkazishni ko‘zlamoqda.
Bu turnir aniq bo‘ladi, — dedi UFC prezidenti Dana Uayt CBS Morning dasturi efirida.
Uning so‘zlariga ko‘ra, musobaqani o‘tkazish tartibi AQSH prezidenti Donald Tramp bilan muhokama qilingan. Endi faqat texnik tafsilotlarni Oq uy administratsiyasi bilan kelishish qolgan. Turnir 2026-yilda Amerika Qo‘shma Shtatlarining 250 yilligiga bag‘ishlanadi.
UFC Oq uy hududida o‘tkaziladigan musobaqaning ishtirokchilar ro‘yxati hozircha aniqlanmagan. Nomzodlar orasida eng ko‘p tilga olinayotgan sportchi — Trampning sevimli jangchisi Kolbi Kovington. Ammo uning so‘nggi janglardagi natijalari va diviziondagi kuchli raqobat bu imkoniyatni qiyinlashtirishi mumkin. Shuningdek, yamaykalik Rendi Braun ham Kovington bilan jang qilish istagini bildirgan.
Ma’lumotlarga ko‘ra, Donald Tramp nafaqat UFCning barcha yirik turnirlarida faxriy mehmon sifatida qatnashadi, balki liga qiyin vaziyatda bo‘lgan davrda yordam bergan shaxs sifatida Dana Uayt bilan yaqin do‘stona aloqaga ega. Trampning fikricha, AQShdagi aralash yakkakurash muxlislarining katta qismi uning saylovchilari hamdir.
Trampning rejasiga ko‘ra, jang 2026-yilda, AQSH Mustaqillik deklaratsiyasi imzolanganining 250 yilligi munosabati bilan o‘tkaziladi. AQSH prezidenti taxminan 25 ming tomoshabin kelishini kutmoqda. Bu yangilikka tajribali yulduzlar ham befarq qolmadi. Jon Jons ijtimoiy tarmoqlarda Oq uyda bo‘ladigan turnirda qatnashishi mumkinligini ishora qildi.
Konor Makgregor esa shunday yozdi:
AQShni 4-iyul — Mustaqillik kuni bilan tabriklayman! Prezident Trampning Oq uyda UFC jangi o‘tkazish qarori meni hayratda qoldirdi. Bu men uchun ulkan sharaf bo‘lardi! Menga ishonishingiz mumkin!
Oq uy hududida jang o‘tkazish texnik jihatdan imkoni bor — katta maydonda oktagon o‘rnatish mumkin. Asosiy savol esa xavfsizlikni ta’minlash va tadbir formatini aniqlashda. Sababi Tramp hozircha faqat bitta jang haqida gapirgan, to‘liq turnir haqida emas.
Izoh (0)