Janubiy Koreya prezidenti Yun Sok Yol mamlakat Milliy razvedka xizmati rahbari Kim Gyu Xyonning isteʼfosini qabul qildi. Bu haqda Reuters xabar berdi.
Razvedka rahbarining birinchi va ikkinchi o‘rinbosarlari ham ishdan bo‘shatilgan.
“Hokimiyat almashinuvi davrida Kim Gyu Xyon xavfsizlik sohasida asosiy razvedka xizmati sifatida milliy razvedka maqomini mustahkamladi. U do‘st davlatlarning razvedka idoralari bilan hamkorlik tizimini yaratishga harakat qildi”, — deyiladi prezident administratsiyasida.
Prezident Xon Chan Vonni milliy razvedka xizmati rahbarining birinchi o‘rinbosari lavozimiga tayinlagan, u “bir muddat” razvedka direktori vazifasini bajaruvchi bo‘lib ishlaydi. Xvan Von Chjin ikkinchi o‘rinbosar lavozimiga tayinlangan. Yonhap axborot agentligi razvedka boshlig‘ining iste’fosi haqidagi qarorni kutilmagan deb atadi.
Janubiy Koreya prezidenti Yun Sok Yol yaqinda Buyuk Britaniya va Fransiyaga amalga oshirgan safaridan qaytdi. 25-noyabr kuni Kim Myon Su Koreya Qurolli kuchlari shtab boshliqlari qo‘mitasi rahbari etib tayinlandi. Oktyabr oyining boshida mamlakat mudofaa vaziri almashgandi.
Izoh (0)