Shimoliy Koreya butun dunyo bo‘ylab o‘z elchixonalarini ommaviy yopishni boshladi, shu bilan birga Rossiya bilan munosabatlarni faollashtirdi. Bloomberg agentligiga ko‘ra, Shimoliy Koreya yetakchisi Kim Chen In diplomatik vakolatxonalar orqali emas, balki Kreml bilan qurol-yarog‘ bo‘yicha kelishuvlar orqali ko‘proq pul olishga bel bog‘lagan bo‘lishi mumkin.
Shimoliy Koreya ommaviy axborot vositalari mamlakat oktyabr oyida Uganda va Angoladagi elchixonalarini yopganini xabar qildi. Pxenyan, shuningdek, Gonkongdagi konsulxonasi va Afrikadagi o‘ndan ortiq diplomatik vakolatxonalari, shuningdek, Ispaniyadagi elchixonasini yopishni rejalashtirmoqda.
Janubiy Koreyadagilarning fikricha, Kim Chen Inning “g‘aznasini quritayotgan” global sanksiyalar tufayli KXDR budjetida barcha diplomatik idoralarni saqlab qolishga pul yetmayapti. Hozirda Pxenyanda 47 ta elchixona, uchta konsulxona va uchta vakolatxona mavjud.
Avvalroq AQSH, Buyuk Britaniya va boshqa davlatlar Shimoliy Koreya elchixonalarini o‘z faoliyatini moliyalashtirish uchun noqonuniy moliyaviy sxemalar ishlab chiqishda, Pxenyandagi yetakchilar uchun hashamatli tovarlar xarid qilish va insofsiz usullar bilan naqd pullar olishda ayblagan.
Ammo elchixonalarning joriy yopilishi Shimoliy Koreyaning Rossiyaga Ukrainadagi urushda qo‘llanadigan o‘q-dorilar jo‘natish bo‘yicha o‘zining daromadli biznesini faollashtirgani bilan bog‘liq, deb yozadi Bloomberg.
Mutaxassislarning ta’kidlashicha, elchixonalar Shimoliy Koreyaga sof pul oqimlari nuqtayi nazaridan ikkinchi darajali bo‘lib qolgan: hozir Kim Chen In uchun Rossiya bilan kelishuvlar ulardan ko‘ra ko‘proq ahamiyatga ega.
Maʼlum qilinishicha, Shimoliy Koreya avgust oyidan beri Rossiyaga 1 milliondan ortiq artilleriya snaryadlarini jo‘natgan va bu yuklarning qiymati 3 milliard dollarni tashkil qilishi mumkin. Ushbu summa Shimoliy Koreya iqtisodiyotining 10 foizdan ortig‘ini tashkil etadi.
Bundan tashqari Rossiya Shimoliy Koreyaga naqd pul, o‘z bank tizimlariga kirish, texnologiyalar uzatish va qurol yaratish uchun ishlatiladigan komponentlarni chet eldan sotib olishga yordam kabilarni o‘z ichiga oluvchi paketni taklif qilayotgan bo‘lishi mumkin. Bu esa Kim Chen Inning elchixonalardan ko‘radigan foydasidan ancha yaxshi, deb xulosa qildi Bloomberg.
Izoh (0)