Shimoliy Koreya KXDR va Janubiy Koreya o‘rtasidagi qurolsizlantirilgan hududni nazorat qiluvchi BMT qo‘mondonligini tarqatib yuborishga chaqirdi. Bu haqda Shimoliy Koreya markaziy telegraf agentligi xabar berdi.
Pxenyan AQSH shafeligida faoliyat yuritayotgan Janubiy Koreyadagi BMT qo‘mondonligini “noqonuniy harbiy tashkilot” deb atagan. 1950-yilda yaratilgan ushbu tuzilma Koreya urushini tugatgan sulh shartlari bajarilishini nazorat qiladi.
Bayonotga Seulda AQSH mudofaa vaziri Lloyd Ostin hamda uning Janubiy Koreya va Yaponiyadagi hamkasblari Shin Von Sik va Minoru Kixara o‘rtasidagi uchrashuv sabab bo‘lgan. Muzokaralar chog‘ida tomonlar Shimoliy Koreya raketalari bo‘yicha real vaqt rejimida ma’lumotlar almashish sxemasi bo‘yicha kelishib olgan, KXDR va Rossiya o‘rtasidagi kuchayib borayotgan harbiy hamkorlikni qoralab, buni BMT rezolyutsiyalarini buzish deb atagan.
AQSH davlat kotibi Entoni Blinken Seulga tashrifi chog‘ida Rossiya va KXDR o‘rtasidagi harbiy hamkorlik kuchayib borayotganidan xavotir bildirgan, koreyalik hamkasbi Pak Chinning “jiddiy xavotirlari”ni tushunishini aytgandi.
Sentyabr oxirlarida KXDR Oliy xalq assambleyasi konstitutsiyaga Shimoliy Koreyaning yadroviy davlat maqomini mustahkamlovchi o‘zgartirishlarni qabul qilgandi. Ushbu o‘zgartirishlar Shimoliy Koreyaning atom qurollari arsenalini oshirishini va bundan buyon o‘zini to‘laqonli yadroviy davlat deb bilishini nazarda tutadi. Tuzatishlar ikki kunlik muhokamadan so‘ng qabul qilingan.
Izoh (0)