Oliy Radadagi “Xalq xizmatkori” fraksiyasi rahbari, Rossiya bilan muzokaralarda Ukraina delegatsiyasiga boshchilik qilgan David Araxamiyaning aytishicha, 2022-yil bahorida Rossiya delegatsiyasi Ukraina NATOga a’zo bo‘lishdan bosh tortsa, urushni tugatishini bildirgan.
Ular so‘nggi daqiqagacha umid qilishdi, biz betaraflikni tan olishimiz uchun shunday shartnoma imzolashimizni kutishdi. Bu ular uchun eng katta kelishuv bo‘lardi. Agar biz o‘tmishdagi Finlandiya singari betaraflikni qabul qilsak va NATOga qo‘shilmaslik majburiyatini olsak, ular urushni tugatishga tayyor edi. Asosiy punkt shu bo‘lgan, — dedi Araxamiya 1+1 telekanali jurnalisti Natalya Moseychukka bergan intervyusida.
Ukraina vakillari nega bu taklifni qabul qilmagani haqidagi savolga javob berar ekan, Araxamiya buning uchun Ukraina NATOga a’zo bo‘lish ko‘rsatilgan Konstitutsiyani o‘zgartirish zarurligini aytdi. Bundan tashqari, siyosatchining aytishicha, Ukraina rasmiylari ruslarga ishonmagan.
Ruslarning bu ishni qila olishiga ishonch yo‘q edi. Buni faqatgina xavfsizlik kafolatlari mavjud bo‘lganda amalga oshirish mumkin edi. Biz ularga ko‘proq tayyorgarlik ko‘rish imkonini beradigan narsaga imzo cheka olmasdik. Bunday holat boshqa takrorlanmasligiga 100 foiz ishonch hosil qilganimizdagina ishlay olardik. Ammo bunday ishonch yo‘q.
Bundan tashqari, biz Istanbuldan qaytganimizda, Boris Jonson Kiyevga keldi va ular bilan umuman hech narsa imzolamasligimiz kerakligini, shunchaki jang qilishimizni aytdi, — deb izohladi u.
Rossiya va Ukraina keng ko‘lamli urush boshida tinchlik muzokaralarini olib borgan edi. Muzokaralarning bir necha raundi Belarus va Turkiyada bo‘lib o‘tdi. Rossiya qo‘shinlari Kiyevdan chekingach, muzokaralar muzlatib qo‘yildi.
Izoh (0)