Minneapolis sobiq politsiyachisi Derek Shovin Arizona shtatidagi federal qamoqxonada pichoqlanib, og‘ir yaralandi, deb xabar bermoqda Associated Press manbasi. Federal qamoqxonalar byurosi mahbuslardan biri jarohatlanganini tasdiqladi, ammo jabrlanuvchining ismini oshkor qilmadi. Shovin afroamerikalik Jorj Floydning o‘limi uchun 22 yillik qamoq jazosini o‘tamoqda — aynan shu politsiyachi Floydni hibsga olishda uning bo‘ynini o‘n daqiqa davomida tizzasi bilan bosib turgan.
Pichoqlanish hodisasi Tuksondagi axloq tuzatish muassasasida sodir bo‘lgan. AP ma’lumotlariga ko‘ra, qamoqxona “xavfsizlik va xodimlar yetishmasligidan aziyat chekib keladi”: unda 380 ga yaqin odam saqlanadi. Qamoqxonalar byurosi vakilining aytishicha, xodimlar voqea joyiga yetib kelib, mahbus kasalxonaga yotqizilishidan oldin uning hayotini saqlab qolish choralarini ko‘rgan. Xodimlardan hech biri jabrlanmagan. Qamoqxonaga tashriflar to‘xtatilgan.
Derek Shovin bir vaqtning o‘zida Jorj Floydning fuqarolik huquqlarini buzgani uchun 21 yillik federal qamoq jazosini va Minnesota shtatida ikkinchi darajali qotillik uchun 22,5 yillik qamoq jazosini o‘tamoqda. U Minnesota shtatidagi qattiq rejimli qamoqxonadan Tuksondagi o‘rtacha xavfsizlik qamoqxonasiga jo‘natilgandi.
Jorj Floyd 2020-yil 25-may kuni hibsga olish chog‘ida vafot etgan. Afroamerikalikning o‘limiga Shovin deyarli 10 daqiqa davomida uning bo‘ynini tizzasi bilan bosib turgani sabab bo‘lgan. Floydning o‘limi AQSH va boshqa ko‘plab mamlakatlarda irqiy diskriminatsiyaga qarshi norozilik namoyishlariga sabab bo‘ldi.
Izoh (0)