Sog‘liqni saqlash xodimlari Xitoyda noma’lum kasallik holatlari ko‘payganini tekshirmoqda, bolalar pnevmoniya bilan kasalxonaga yotqizilmoqda. Bu haqda New Scientist xabar berdi.
Xitoyda noma’lum pnevmoniya tarqalayotgani bo‘yicha nimalar ma’lum?
Xitoyda bolalarning mahalliy kasalxonalarga yotqizilishi tez sur’atlar bilan ortib bormoqda. Hozircha nomaʼlum patogen sabab bo‘lgan pnevmoniya epidemiyasi butun mamlakat shaharlariga, jumladan Pekinga ham tarqalgan.
Xitoyning so‘g‘liq bo‘yicha muammosi haqida butun dunyo bo‘ylab odamlar va hayvonlar kasalliklarining tarqalishini kuzatuvchi ProMed jamoatchilik nazorati tizimi xabar berdi. U birinchilardan bo‘lib bolalardagi “tashhis qo‘yilmagan pnevmoniya” epidemiyasini aniqladi va batafsil tavsifladi.
ProMed 22-noyabr kuni yangi ogohlantirish e’lon qildi. Poytaxt Pekin va Lyaonin provinsiyasidagi shifoxonalarda pnevmoniyadan aziyat chekayotgan bolalar oqimi kuzatilayotgani aytildi.
“Ko‘p odamlar kasalxonaga yotqizilgan, haqiqatan ham juda ko‘p. Ularda yo‘tal yoki hech qanday alomat yo‘q. Ularda shunchaki harorat ko‘tarilgan va ularning ko‘pchiligining o‘pkalarida tugunlar paydo bo‘lmoqda”, — deydi Pekin aholisidan biri.
“Hisobotda gap aniqlanmagan respirator kasallikning keng tarqalgan epidemiyasi haqida ketayotganini bildiradi. Epidemiya qachon boshlangani umuman aniq emas, chunki juda ko‘p bolalar tez kasal bo’layotgani odatiy hol emas”, —deydi ProMed muharriri.
Hisobotda kattalar kasallangani aytilmagan. Aynan ProMed 2019-yil dekabr oyi oxirida sirli virus haqida ogohlantirgan va keyinchalik u Sars-Cov-2 nomini olgandi.
Kasallikning manbai nima?
Tashkilot hisobotida qayd etilishicha, kasallik bakterial, virusli yoki boshqa sabablar bilan bog‘liqmi, hozircha aniq emas. Kasallikning sababi va darajasini aniqlash uchun qo‘shimcha ma’lumot kerak.
Kasallikning tarqalishi Mycoplasma pneumoniae bakteriyasi bilan bog‘liq bo‘lishi mumkin. Boshqa davlatlar, shu jumladan Buyuk Britaniya va AQSH, Chexiya ham pandemiya cheklovlari olib tashlanganidan keyin RSV va gripp kabi kasalliklarning o‘sishini kuzatdi.
Pekin bolalar kasalxonasining ambulatoriya bo‘limi direktori bir oy oldin xuddi shu muammolar haqida gapirib, China Voice’ga uning kasalxonasi bu yil ham bolalarning nafas olish kasalliklari bilan kurashayotganini aytgandi.
Xitoy JSSTning ma’lumotlarni almashish chaqirig‘iga qanday javob berdi?
JSST so‘roviga ko‘ra, Xitoyning Sinxua davlat axborot agentligi Xitoy Milliy sog‘liqni saqlash komissiyasi (NHC) rasmiylariga iqtibos keltirgan holda, ular nafas yo‘llari kasalliklari bilan og‘rigan bolalarni tashxislash va davolashga jiddiy e’tibor qaratilayotgani haqida maqola chop etdi.
Keyinchalik JSST Xitoyda “g‘ayrioddiy yoki yangi patogenlar” aniqlanmaganini va mamlakat shimolida tarqaladigan nafas olish kasalliklarining ko‘payishiga “bir nechta ma’lum patogenlar” sabab bo‘lganini bildirdi.
Mutaxassislar vahima qilmaslikka chaqirmoqda
JSSTga koronavirus bo‘yicha maslahat beradigan olimlar bolalardagi noma’lum pnevmoniya bo‘yicha ko‘plab ma’lumot to‘planishini kutishga chaqirdi.
Oxir-oqibat rivojlanayotgan patogenlar sonini hisobga olsak, dunyo, albatta, qandaydir infeksiyadan kelib chiqqan yana bir pandemiyani boshdan kechiradi. Ammo Xitoyda bunday holatlar yangi patogen sabab kelib chiqqan bo‘lsa, unda kattalar ham kasal bo‘lishi kerak edi.
“Men hozirda bilgan narsalarimizga asoslanib, pandemiya haqida vahima tugmasini bosmoqchi emasman, lekin JSSTning Xitoydan javobini va JSSTning keyingi baholashini ko‘rish menga juda qiziq”, — dedi JSSTga pandemiya bo‘yicha maslahat bergan sog‘liqni saqlash mutaxassisi Brayan Makkloski.
Izoh (0)