Toshkent shahrining Shayxontohur tumanida joylashgan Abdulla Qodiriy ko‘chasi Labzak ko‘chasidan Sharof Rashidov shohko‘chasigacha bo‘lgan qismida 24-noyabr 09:00 dan boshlab avtomobillar harakati vaqtincha qisman cheklanadi. Bu haqda poytaxt hokimligi matbuot xizmati xabar berdi.
Qayd etilishicha, yo‘lning ushbu qismida taʼmirlash ishlari amalga oshiriladi. Ishlar jarayonida yo‘lning bir tarafi yopilib, har ikki yo‘nalishga harakat yo‘lning ikkinchi tarafidan o‘tadi.
Shuningdek, Yakkasaroy tumanida joylashgan Turob To‘la va Furqat ko‘chasining chorrahasida ham joriy ta’mirlash ishlari amalga oshiriladi. Shu sababli 24-noyabr 09:00 dan boshlab, ishlar jarayonida yo‘lning bir tarafi yopilib, har ikki yo‘nalishga harakat yo‘lning ikkinchi tarafidan o‘tadi.
“Yetkazilgan noqulayliklar uchun uzr so‘raymiz va haydovchilardan aylanma yo‘llardan foydalanishni iltimos qilamiz”, — deyiladi xabarda. Taʼmirlash ishlari qachongacha davom etishiga aniqlik kiritilmagan.
Avgust oxirlarida Toshkent shahar Mirobod tumanidagi Yakub Kolas ko‘chasining bir qismi avtomobillar harakati uchun vaqtincha yopilgani to‘g‘risida xabar berilgandi.
Izoh (0)