Qoraqalpog‘iston Respublikasida ko‘mir sotib olish uchun ajratilgan mablag‘larni talon-toroj qilgan MCHJ rahbari aniqlandi, deb xabar beradi Bosh prokuratura huzuridagi departament.
Qayd etilishicha, departamentning Xo‘jayli tuman bo‘limi tomonidan tergovga qadar tekshiruv o‘tkazildi. Tekshiruvda “S.g.” MCHJ masʼul shaxslari 2023—2024-yilgi kuz-qish mavsumida 18 ta taʼlim tashkiloti va 1 ta oilaviy poliklinikaga ko‘mir sotib olish uchun ajratilgan 1,1 milliard so‘mning 187,5 million so‘mini boshqa maqsadlarda sarflagani aniqlangan. Shuningdek “T.B.” MCHJ go‘yoki 1 017 tonna ko‘mir yetkazib bergani to‘g‘risida soxta hujjatlarni rasmiylashtirib, 931,5 million so‘mni o‘zlashtirish yo‘li bilan talon-toroj qilgan.
Mazkur holat yuzasidan Jinoyat kodeksining 167-moddasi (o‘zlashtirish yoki rastrata yo‘li bilan talon-toroj qilish) va 228-moddasi (hujjatlar, shtamplar, muhrlar, blankalar tayyorlash, ularni qalbakilashtirish, sotish yoki ulardan foydalanish) bilan jinoyat ishi qo‘zg‘atilib, tergov harakatlari o‘tkazilmoqda.
Bundan oldin Andijonning Andijon, Buloqboshi, Jalaquduq tumanlarida aholiga ajratilgan ko‘mirni talon-toroj qilgan ombor mudirlari qo‘lga olingani to‘g‘risida xabar berilgandi. Shuningdek, O‘zbekistonning yana uchta hududida 1,2 ming tonnadan ortiq ko‘mir talon-toroj qilingani aniqlangan edi.
Izoh (0)