Yoshlar orasida Konsta taxallusi bilan tanilgan reper Sharif Abdullayev “Daryo”ning YouTube diga kanaliga bergan intervyusida “Xalqlar do‘stligi” sanʼat saroyida konsert berishni istamasligi, reperlar festivalidan chiqishdan bosh tortgani va hech qachon o‘z prinsiplaridan voz kechmasligi haqida gapirdi.
— “Xalqlar do‘stligi” hamma o‘rgangan, konsert qilsa osonroq bo‘ladigan joy. Rep xalqimizga noodatiyroq, uni tikka turib tinglagan maʼqul. Shu bois, konsertimiz orqali “Xalqlar do‘stligi”dan tashqari yerlarda ham konsert berish mumkinligini ko‘rsatishga qaror qildik. Rep qo‘shiqlarini shunchaki o‘tirib tinglab bo‘lmaydi. Shoxruh “Xalqlar do‘stligi” sanʼat saroyida bo‘lgan konsertida ham hech kim o‘tirib, konsertni tomosha qilmagan. Yarim soatdan so‘ng birinchi-ikkinchi qator tushunchalari ahamiyatsiz bo‘lib qolgan, — deydi Konsta.
Dekabr oyida “Humo” muz saroyida o‘zbek reperlarining festivalida Konsta ham ijro etishi kerak edi. Ammo u ijtimoiy tarmoqlardagi sahifalarida konsertda ishtirok etmasligini maʼlum qildi. Ammo shu kungacha buning aniq sabablarini izohlamagandi.
— Mening sanʼatkor sifatida o‘z pozitsiyalarim bor. Rep festivali g‘oyasini eshitib juda xursand bo‘ldim, 10 ta reper “Humo”da ishtirok etayotgani quvonishga arziydigan voqea. Agar 10 ta reper “Humo”da kuylaydi desak zo‘r, ammo falonchi, pismodonchi va boshqalar desa yaxshi emas. Yaʼni konsertoldi kelishuvlar buzildi, shu bois unda ishtirok etishdan bosh tortdim. Menimcha, har bir ijodkor o‘z hurmatini talab qilishni bilishi kerak. Mening chiqib ketishim, boshqalarning foydasiga oz bo‘lsa-da taʼsir qildi, deb hisoblayman, — deydi Konsta.
Rep ustasi Konsta hayotda o‘z prinsiplariga sodiq qolishi va hech narsa ulardan voz kechishiga arzimasligi haqida gapirdi.
— Agar bir sanʼatkor brend deb oladigan bo‘lsak, u faoliyati yo‘lga qo‘yishdan avval unga nimalar mumkinligi va mumkin emasligi haqida aniq rejalashtirib olinadi. Aslida hamisha o‘ziga xoslikka eʼtibor berish kerak, bo‘lmasa boshqalardan farq qilmaydigan bo‘lib qoladi. Shu kungacha o‘z prinsiplarim sabab juda ko‘p shartnomalarni bekor qilishimga to‘g‘ri kelgan. Ammo bundan hech qachon afsuslanmayman. Chunki prinsipimga sodiq qolib bittasidan voz kechsam, bundan ham yaxshirog‘i kelishiga ishonaman. Amaliyotda ham xuddi shunday bo‘lgan. Haligacha mashina boshqarmayman, oddiy uyda yashayman ammo hamisha ko‘nglimda xotirjamlik bor. Hatto, bitta “Rolton” yeb o‘tirganimda ham xotirjam bo‘laman. Chunki menda “Prinsiplarimdan voz kechib, bo‘lsa bo‘ldi, shuni qilishim kerak”, degan fikr yo‘q, — deydi Konsta.
Suhbatni to‘liq holda “Daryo”ning YouTube dagi kanalida tomosha qilishingiz mumkin.
Izoh (0)