“Yevropa o‘zbekistonlik eksportchilarga boj imtiyozlari berishda davom etadi” — O‘zbekiston uchun “GSP+” muddati uzaytirildi

Yevropa parlamenti va Yevropa kengashi O‘zbekiston uchun “GSP+” tizimining amal qilish muddatini to‘rt yilga uzaytirdi. Bu haqda 23-noyabr kuni Investitsiyalar, sanoat va savdo vazirligi hamda Yevropa Ittifoqining O‘zbekistondagi delegatsiyasi ishtirokida o‘tkazilgan matbuot anjumanida maʼlum qilindi, deya xabar bermoqda “Daryo” muxbiri.

 

Tadbirda Yevropa Ittifoqi delegatsiyasining O‘zbekistondagi rahbari, elchi Sharlotta Adrian “GSP+” o‘zaro savdo aloqalariga ijobiy taʼsir ko‘rsatayotganini taʼkidladi.

Kecha Yevropa parlamenti va Yevropa kengashi “GSP+”ni oldingi shartlar asosida 2027-yilning 31-dekabr kunigacha uzaytirish to‘g‘risida qaror qabul qilganini faxr bilan aytaman. Bu o‘zbekistonlik eksportchilar va ishlab chiqaruvchilar uchun katta imkoniyat degani. Yevropaga o‘z mahsulotlari eksportini yo‘lga qo‘ygan har bir yetkazib beruvchi mazkur tizim imtiyozlaridan foydalanishni davom ettirishi mumkin. Yaʼni ular “GSP+” doirasida mahsulotlarini Yevropaga soliqlarsiz eksport qiladilar,—dedi elchi.

Uchrashuvda Investitsiyalar, sanoat va savdo vazirining o‘rinbosari Badriddin Obidov “GSP+” Yevropaga eksport hajmi ortishida katta turtki bo‘layotganini aytdi.

“GSP+” tizimi O‘zbekistonga 6200 turdagi mahsulotni 450 million aholisi bor Yevropaga import bojlarisiz eksport qilish imkonini bermoqda. Biz shu imkoniyatdan foydalanib, yangi marralarga intilyapmiz. Xususan, joriy yil yakunigacha Yevropa bozorlariga eksport hajmini bir milliard dollarga yetkazish harakatidamiz”, —dedi vazir o‘rinbosari.

Muloqotda maʼlum qilinishicha, 2022-yilda O‘zbekistondagi 628 ta korxona Yevropa davlatlariga 647 million dollarlik mahsulotlar eksport qilgan. Xususan, “GSP+” doirasidagi imtiyozlar asosida to‘qimachilik sanoatida – 177,4 million dollar, kimyo sanoatida – 138,3 million dollar, qishloq ho‘jaligi va oziq ovqat sanoatida – 19,7 million dollar, elektrotexnika sanoatida – 9 million dollar miqdoridagi mahsulotlar Yevropa bozorlariga eksport qilingan.

2022-yilda “GSP+” tufayli o‘zbekistonlik eksportchilar 28 million yevroga teng import bojlarini tejab qolgan.