Европа парламенти ва Европа кенгаши Ўзбекистон учун “GSP+” тизимининг амал қилиш муддатини тўрт йилга узайтирди. Бу ҳақда 23 ноябрь куни Инвестициялар, саноат ва савдо вазирлиги ҳамда Европа Иттифоқининг Ўзбекистондаги делегацияси иштирокида ўтказилган матбуот анжуманида маълум қилинди, дея хабар бермоқда “Дарё” мухбири.
Тадбирда Европа Иттифоқи делегациясининг Ўзбекистондаги раҳбари, элчи Шарлотта Адриан “GSP+” ўзаро савдо алоқаларига ижобий таъсир кўрсатаётганини таъкидлади.
Кеча Европа парламенти ва Европа кенгаши “GSP+”ни олдинги шартлар асосида 2027 йилнинг 31 декабрь кунигача узайтириш тўғрисида қарор қабул қилганини фахр билан айтаман. Бу ўзбекистонлик экспортчилар ва ишлаб чиқарувчилар учун катта имконият дегани. Европага ўз маҳсулотлари экспортини йўлга қўйган ҳар бир етказиб берувчи мазкур тизим имтиёзларидан фойдаланишни давом эттириши мумкин. Яъни улар “GSP+” доирасида маҳсулотларини Европага солиқларсиз экспорт қиладилар, — деди элчи.
Учрашувда Инвестициялар, саноат ва савдо вазирининг ўринбосари Бадриддин Обидов “GSP+” Европага экспорт ҳажми ортишида катта туртки бўлаётганини айтди.
“GSP+” тизими Ўзбекистонга 6200 турдаги маҳсулотни 450 миллион аҳолиси бор Европага импорт божларисиз экспорт қилиш имконини бермоқда. Биз шу имкониятдан фойдаланиб, янги марраларга интиляпмиз. Хусусан, жорий йил якунигача Европа бозорларига экспорт ҳажмини бир миллиард долларга етказиш ҳаракатидамиз”, — деди вазир ўринбосари.
Мулоқотда маълум қилинишича, 2022 йилда Ўзбекистондаги 628 та корхона Европа давлатларига 647 миллион долларлик маҳсулотлар экспорт қилган. Хусусан, “GSP+” доирасидаги имтиёзлар асосида тўқимачилик саноатида – 177,4 миллион доллар, кимё саноатида – 138,3 миллион доллар, қишлоқ ҳўжалиги ва озиқ овқат саноатида – 19,7 миллион доллар, электротехника саноатида – 9 миллион доллар миқдоридаги маҳсулотлар Европа бозорларига экспорт қилинган.
2022 йилда “GSP+” туфайли ўзбекистонлик экспортчилар 28 миллион еврога тенг импорт божларини тежаб қолган.
Изоҳ (0)