Shimoliy Koreya HAMASga yordam berishni rejalashtirayotgani aytildi

Shimoliy Koreya HAMASga Isroilga qarshi urushda “yordam” berishni rejalashtirmoqda. Bu haqda Janubiy Koreya razvedka agentligi xabar berdi.

Janubiy Koreya Milliy razvedka xizmati (NIS) xabariga ko‘ra, Shimoliy Koreya yetakchisi Kim Chen In yopiq eshiklar ortida o‘tkazilgan audit yig‘ilishida rasmiylarga Falastinga har tomonlama yordam ko‘rsatish choralarini ko‘rishni buyurgani bo‘yicha belgilar bor. Aynan qanday yordam haqida gap ketayotgani hozircha noma’lum.

“Shimoliy Koreya Isroil—HAMAS urushidan turli yo‘llar bilan foydalanishga urinayotganga o‘xshaydi”, — dedi janubiy koreyalik amaldor Yu Sanbum.

O‘tgan hafta Isroilning Janubiy Koreyadagi elchisi Tel-Aviv “Shimoliy Koreyada ishlab chiqarilgan qurollar HAMAS tomonidan qo‘llanayotganidan” xabardor ekanini aytgandi.

Shimoliy Koreyaning BMTdagi elchisi Kim Son bu bayonotni “asossiz mish-mish” deya rad etib, Vashingtonni Yaqin Sharqdagi urush uchun aybni “uchinchi davlat” zimmasiga yuklamoqchi bo‘layotganlikda aybladi.