Исроил миллий хавфсизлик вазири Итамар Бен-Гвир Ғазо секторидаги уруш вақтинчалик гуманитар паузадан кейин давом этмаса, истеъфога чиқишини маълум қилди.
Ўта ўнг сиёсатчининг сўзларига кўра, бу ҳолда “унинг ҳукуматда қиладиган ҳеч қандай иши қолмайди”. У мамлакат бош вазири Бенямин Нетаняхунинг урушни давом эттиришга ваъда берган баёнотини эслатди.
Аввалроқ Бен-Гвир ўзининг Х ижтимоий тармоғидаги аккаунтида (собиқ Twitter) Исроил ва ҲАМАС ўртасида маҳбуслар алмашинувини назарда тутувчи келишувни танқид қилган эди.
22 ноябрь куни Исроил раҳбарияти ҲАМАС билан асирларни алмашиш ҳақидаги келишувни қабул қилди. Келишув тўрт кунлик ўт очишни тўхтатиш ва Исроил қамоқхоналаридаги 150 нафар фаластинлик маҳбусни озод қилиш эвазига 50 нафар гаровга олинган исроилликларни қўйиб юборишни ўз ичига олади.
Келишув дастлаб пайшанба куни эрталаб кучга кириши керак эди. Бироқ кейин Исроил Ғазо секторида сулҳ бошланиши ва ҲАМАС билан гаровга олинганларни алмашишни жума кунига қолдирди.
Изоҳ (0)