O‘zbekistonda hafta o‘rtalarida ob-havo yomonlashishi kutilmoqda

Hafta o‘rtalarida ob-havo yomonlashishi kutilmoqda, deb xabar bermoqda “O‘zgidromet”.

Qayd etilishicha, 20-noyabr, dushanba kuni O‘zbekiston hududi bo‘ylab havo biroz bulutli bo‘ladi, baʼzi joylarda o‘zgarib turadi, yog‘ingarchilik kutilmaydi. Kunning o‘rtasiga kelib havo 20-23 darajagacha iliq bo‘ladi.

Seshanba kuni yanada iliqroq bo‘lishi kutilmoqda, kunduzi havo harorati 24-27 daraja iliq bo‘ladi va respublikaning aksariyat qismida yog‘ingarchilik kuzatilmaydi, faqat Qoraqalpog‘iston, Xorazm viloyatida, kunning ikkinchi yarmida Buxoro, Navoiy viloyatlarining baʼzi joylarda yomg‘ir yog‘adi.

22-noyabr, chorshanba kuni shimoliy-g‘arbiy hududlardan kirib kelayotgan nam havo massasi butun O‘zbekiston hududi bo‘ylab tarqaladi. Respublika hududining katta qismida yomg‘ir yog‘adi, tog‘ oldi hududlarining ayrim joylarida kuchli yog‘ingarchilik kutiladi.

23-noyabr kuni faqat Farg‘ona vodiysi viloyatlarida yomg‘ir yog‘adi, qolgan hududlarda yog‘ingarchilik kutilmaydi. 24-noyabrda respublikaning barcha hududi bo‘ylab havo quruq bo‘ladi.

Tog‘li hududlarda yog‘ingarchilik bo‘ladi, 22—23-noyabr kunlari vaqti-vaqti bilan kuchli yog‘adi.

20—22-noyabr kunlari baʼzi joylarda shamol tezligi 15-20 metr/sekundgacha kuchayishi, 21-23 metr/sekundgacha yetishi, ayrim joylarda chang-to‘zon bilan kuzatilishi mumkin.

Havo harorati 22—24-noyabrda 13-18 darajagacha, baʼzi joylarda 10-12 darajagacha pasayadi. 23—24-noyabr kunlari kechasi harorat 3-6 daraja iliqqacha pasayadi, shimolda 1-3 daraja sovuqqacha tushishi mumkin.

Toshkentda dushaba va seshanba kunlari yog‘ingarchilik kutilmaydi. 22-noyabrda vaqti-vaqti bilan yomg‘ir yog‘adi. 23—24-noyabrda yana yog‘ingarchilik kutilmaydi. Sharqiy shamol yo‘nalishini o‘zgartirib, g‘arbdan 5-10 metr/sekund tezlikda esadi, 22-noyabrda 12-15 metr/sekundgacha kuchayishi mumkin.

Harorat bugun kunduzi 20-22 daraja, seshanba kuni 24-26 daraja iliq bo‘ladi. 22—24-noyabrda havo harorati 13-18 daraja iliqqacha, 23-noyabrda 11-13 daraja iliqqacha pasayadi. 21—22-noyabrda harorat kechasi 10-15 daraja, 23—24-noyabrda 3-8 daraja iliqqacha pasayadi.