Fransiyalik marhum xonanda Edit Piafning ovozi va tashqi qiyofasi u haqida suratga olinadigan biografik animatsion film uchun sunʼiy intellekt yordamida qayta tiklanadi.
Umumiy hisobda 90 daqiqa davom etadigan filmga “Edit” deb nom berilgan, u 1920-1960-yillarni, xonanda Parij va Nyu-York shaharlarida yashagan davrdagi voqealarni qamrab oladi. Loyiha mualliflarining aytishlaricha, Piafning “mashhur ovozi va tashqi qiyofasi u haqidagi hikoyaning haqqoniyligi hamda muxlislarga ko‘rsatiladigan ruhiy taʼsir darajasini oshiradi”.
WMG konserni loyihani amalga oshirishda ayni vaqtda Edit Piafning barcha qo‘shiqlariga egalik qiluvchi “Edith Piafʼs Estate” tashkiloti bilan hamkorlikda ishlaydi. Tashkilot kinematograflar va SI bo‘yicha mutaxassislarga xonandaning yozib olingan yuzdan ortiq chiqishlari tasviri hamda suratlaridan foydalanish uchun ruxsat beradi.
“Animatsiya uning hikoyasiga zamonaviy ko‘rinish beradi, shu bilan birga filmga arxiv suratlar, sahnadagi va televideniyedagi chiqishlar, intervyularning kiritilgani tomoshabinlarga Piaf hayotining eng muhim lahzalariga haqqoniy nazar tashlash imkoniyatini taqdim etadi”, – loyiha mualliflari.
Filmda xonandaga tegishli bo‘lgan “La Vie en rose” (1947) va “Non, je ne regrette rien” (1956) qo‘shiqlarining original yozuvlaridan foydalaniladi.
Biografik filmni suratga olish bilan “Warner Music Entertainment” va “Seriously Happy” kompaniyasi shug‘ullanmoqda. Ssenariy mualliflari – Jyuli Veyl va Jil Marliak hisoblanadi. Ularning aytishlaricha, kartinada Piafning bugungi kunga qadar muxlislari uchun nomaʼlum bo‘lgan qirralari ochib beriladi.
Edit Piaf – Fransiyaning eng mashhur xonandalaridan biri bo‘lib, uni “Fransuz tilidagi qo‘shiqlar qirolichasi” deya taʼriflaydilar. Xonanda 47 yoshida buyrak yetishmovchiligi tufayli anevrizma yorilishi natijasida vafot etgan. Kasallikka ijodkorning spirtli ichimliklarga mukkasidan ketgani va bir nechta avtohalokatlarni boshdan kechirgani sabab bo‘lgan.
Izoh (0)