Surxondaryo viloyati Qumqo‘rg‘on tumani hokimining “To‘da” mahallasidagi yordamchisi fuqarolarni aldab, ularning nomiga 132 million so‘mlik imtiyozli kredit rasmiylashtirdi. Va mablag‘larni shaxsiy manfaatlariga sarflab yubordi. Bu haqda viloyat prokuraturasi xabar berdi.
Ma’lum qilinishicha, hokim yordamchisining kirdikori “Mushtum” jurnalining ijtimoiy tarmoqlardagi sahifasida fosh etilgan.
Qumqo‘rg‘on tumanining “To‘da” mahalla fuqarolar yig‘inida faoliyat yurituvchi hokim yordamchisi U.T. tadbirkorlik faoliyati bilan ham shug‘ullanib, ta’minotchi sifatida fuqaro M.E. va boshqalarni aldab, ularning nomiga kredit rasmiylashtirgan. Fuqarolarning elektron imzolarini qo‘lga kiritgan hokim yordamchisi issiqxona tashkil etish uchun to‘rt marotaba 33 million so‘mdan jami 132 million so‘m kredit pullarini o‘zi rahbarlik qilayotgan jamiyat — “Volunteer team” MCHJ hisob raqamiga o‘tkazib, shaxsiy manfaatiga sarflab yuborgan, - deyiladi viloyat prokuraturasi axborotida.
Prokuraturaning qo‘shimcha qilishicha, ushbu qilimishi uchun hokim yordamchisi lavozimidan olinib, unga nisbatan Jinoyat kodeksining 168-moddasi 3-qismi “b”, “v” bandlari (firibgarlik) bilan jinoyat ishi qo‘zg‘atilgan.
Hozirda jinoyat ishi bo‘yicha dastlabki tergov harakatlari Qumqo‘rg‘on tumani IIB xuzuridagi Tergov guruhi tomonidan olib borilmoqda. Tergov harakatlarining borishi viloyat prokuraturasi tomonidan nazoratga olingan, — deyiladi rasmiylar axborotida.
Izoh (0)