“Aholini kichik va o‘rta biznesga keng jalb qilishning qo‘shimcha chora-tadbirlari to‘g‘risida”gi prezident qarori loyihasi bilan 2024–2026-yillar uchun “Biznesni rivojlantirish banki” ATB va “Tadbirkorlikni rivojlantirish kompaniyasi” AJ faoliyatining asosiy maqsadli ko‘rsatkichlari belgilandi.
Xususan, hujjat bilan “Biznesni rivojlantirish banki” ATB bo‘yicha quyidagilar amalga oshiriladi:
- kichik biznes subyektlariga ajratiladigan kreditlar qoldig‘ini 1,7 baravar oshirish orqali kredit portfelidagi ulushini 28 foizdan 43 foizga yetkazish;
- kichik biznes loyihalarini moliyalashtirish uchun xalqaro moliya institutlari va xorijiy xususiy moliya tashkilotlaridan jami 800 million AQSH dollari miqdorda resurslar jalb qilish;
- 300 million AQSH dollari miqdorida obligatsiya (yevrobond)larni xalqaro kapital bozorlarida muomalaga chiqarish;
- 150 mingta kichik biznes subyektlari faoliyatini yo‘lga qo‘yish va kengaytirish.
“Tadbirkorlikni rivojlantirish kompaniyasi” AJ bo‘yicha:
- kichik va o‘rta tadbirkorlik subyektlariga ko‘rsatiladigan moliyaviy xizmatlar hajmini 8 trillion so‘mdan 14 trillion so‘mga yetkazish;
- 150 ta o‘rta korxonaga ulush kiritish va xizmatlar ipotekasi asosida 300 ta loyihani tadbirkorlik subyektlariga sotish;
- o‘rta tadbirkorlik subyektlari sonini 2,5 baravarga oshirish;
- 300 million AQSH dollari miqdorida obligatsiyalarni (yevrobond) xalqaro kapital bozorlarida muomalaga chiqarish.
Avgust oxirlarida Turkiyaning Daily Sabah nashri O‘zbekistonda kichik va o‘rta biznesni rivojlantirish uchun yangi qadamlar tashlanayotgani haqida maqola chop etilgandi. Unda mamlakatda kichik va o‘rta korxonalarni qo‘llab-quvvatlash va rivojlantirish uchun keng qamrovli ekotizim yaratilishi, shu maqsadda “Qishloq qurilish bank” Business Development Bank’ga aylantirilgani to‘g‘risida so‘z borgan edi.
Izoh (0)