Тадбиркорликни қўллаб-қувватлаш давлат жамғармаси Тадбиркорликни ривожлантириш компанияси акциядорлик жамияти (компания) сифатида қайта ташкил этилмоқда. Бу ҳақда президентнинг “Кичик ва ўрта бизнесни молиявий қўллаб-қувватлаш тизимини такомиллаштириш чора-тадбирлари тўғрисида”ги фармонида маълум қилинди.
Фармонда лойиҳаларни молиялаштириш учун Тадбиркорликни қўллаб-қувватлаш давлат жамғармасининг амалдаги ташкилий-ҳуқуқий шакли тўғридан тўғри инвестиция жалб этиш имкониятини бермайди ҳамда фаолияти бизнесга йўналтирилмаган. Шу боис жамғарма бюджет маблағларига боғлиқ бўлиб қолмоқда. Бугунги кунга қадар бюджетдан 2,7 триллион сўм ажратилган ва бу даромадлар таркибида 73 фоизни ташкил этади.
Лойиҳаларини молиялаштиришнинг янги ва муқобил инструментларини яратишга эҳтиёжни ҳисобга олган ҳолда Тадбиркорликни қўллаб-қувватлаш давлат жамғармаси Тадбиркорликни ривожлантириш компанияси акциядорлик жамияти (компания) сифатида қайта ташкил этилмоқда.
Компаниянинг ресурс базасини кенгайтириш мақсадида 2023—2024 йилларда компания устав капитали 300 миллиард сўм миқдорида шакллантирилади. Шунингдек, 2024—2025 йилларда халқаро молия институтларидан 100 миллион доллар жалб этилади.
Хусусий инвесторларга компаниянинг устав капиталида иштирок этиш ва компанияга халқаро молия институтларидан мустақил равишда маблағлар жалб этиш ҳуқуқи берилмоқда.
Халқаро агентликларнинг кредит рейтингги олинишини таъминлаш орқали 2026 йилдан бошлаб компаниянинг акция ва облигациялари капитал бозорларида жойлаштирилади.
Компания даромадларини 50 фоизга ошириш орқали 2027 йил якунига қадар ўзини ўзи молиялаштиришга ўтказилади. Бунда, Марказий банк компаниянинг фаолиятини назорат қилиш ва тартибга солиш соҳасида ваколатли давлат органи этиб белгиланмоқда.
Шунингдек, тўғридан тўғри шартномалар тузиш орқали халқаро ва хорижий экспертларни жалб этиш ҳамда IT қурилмалари ва хизматларни сотиб олиш ҳуқуқи берилмоқда.
Компаниянинг фаолиятини ташкил этиш ва тадбиркорларни узлуксиз қўллаб-қувватлаб бориш учун 2023–2024 йилларда Давлат бюджетидан 1,5 триллион сўм ва халқаро молия институтларидан 100 миллион доллар йўналтирилади.
Изоҳ (0)