Britaniya bosh vaziri Rishi Sunak qirollik ichki ishlar vaziri Suella Bravermanni ishdan bo‘shatdi, deb xabar qilmoqda BBC va boshqa Britaniya OAV. Uning o‘rnini, The Sun nashrining yozishicha, hozirgi tashqi ishlar vaziri Jeyms Kleverli egallaydi.
Britaniya matbuotiga ko‘ra, Sunak hukumatda keng ko‘lamli o‘zgarishlar jarayonini boshlagan. Biroq Suella Bravermanga yangi lavozim taklif etilmaydi. Bu uning ichki ishlar vaziri lavozimidan ikkinchi iste‘foga chiqishidir.
U birinchi marta 2022-yil sentyabrida bosh vazir Liz Trass tomonidan bu lavozimga tayinlangan, biroq tez orada uy kompyuteridan rasmiy hujjat yuborgani uchun ishdan bo‘shatilgandi.
Olti kundan keyin u endigina mamlakat bosh vaziri lavozimini egallagan Rishi Sunak kabinetida ichki ishlar kotibi lavozimiga qaytdi.
Bravermanning iste’fosini muxolifat va konservativ deputatlar bir qator munozarali bayonotlari, jumladan, uysiz qolish “hayot tarzi” ekanligi haqidagi da’volari tufayli talab qilishgandi. Vazirning Sunak bilan munosabatlari o‘tgan chorshanba kuni The Times gazetasida Londonda bo‘lib o‘tayotgan Falastinni qo‘llab-quvvatlash mitinglarini tanqid qilib maqola yozganidan keyin butunlay yomonlashdi.
Maqolada Suella Braverman politsiyani tanqid qilib, ularni “ikki tomonlama standartlarda” va “Falastin tarafdori bo‘lgan olomon” bilan, shuningdek, o‘ta o‘ngchilar yurishlari bilan kurashmayotganlikda aybladi. Maqola matni vazirlik bilan kelishilmagan va Rishi Sunakning idorasi maqolaga tuzatishlar kiritishni so‘ragan, Braverman esa buni e’tiborsiz qoldirgan.
Izoh (0)