Британия бош вазири Риши Сунак қироллик ички ишлар вазири Суэлла Браверманни ишдан бўшатди, деб хабар қилмоқда BBC ва бошқа Британия ОАВ. Унинг ўрнини, The Sun нашрининг ёзишича, ҳозирги ташқи ишлар вазири Жеймс Клеверли эгаллайди.
Британия матбуотига кўра, Сунак ҳукуматда кенг кўламли ўзгаришлар жараёнини бошлаган. Бироқ Суэлла Браверманга янги лавозим таклиф этилмайди. Бу унинг ички ишлар вазири лавозимидан иккинчи истеъфога чиқишидир.
У биринчи марта 2022 йил сентябрида бош вазир Лиз Трасс томонидан бу лавозимга тайинланган, бироқ тез орада уй компьютеридан расмий ҳужжат юборгани учун ишдан бўшатилганди.
Олти кундан кейин у эндигина мамлакат бош вазири лавозимини эгаллаган Риши Сунак кабинетида ички ишлар котиби лавозимига қайтди.
Браверманнинг истеъфосини мухолифат ва консерватив депутатлар бир қатор мунозарали баёнотлари, жумладан, уйсиз қолиш “ҳаёт тарзи” эканлиги ҳақидаги даъволари туфайли талаб қилишганди. Вазирнинг Сунак билан муносабатлари ўтган чоршанба куни The Times газетасида Лондонда бўлиб ўтаётган Фаластинни қўллаб-қувватлаш митингларини танқид қилиб мақола ёзганидан кейин бутунлай ёмонлашди.
Мақолада Суэлла Браверман полицияни танқид қилиб, уларни “икки томонлама стандартларда” ва “Фаластин тарафдори бўлган оломон” билан, шунингдек, ўта ўнгчилар юришлари билан курашмаётганликда айблади. Мақола матни вазирлик билан келишилмаган ва Риши Сунакнинг идораси мақолага тузатишлар киритишни сўраган, Браверман эса буни эътиборсиз қолдирган.
Изоҳ (0)