“Tanklar qurshab olgan”: G‘azodagi Al-Quds shifoxonasi faoliyatini to‘xtatdi

G‘azo sektori shimolidagi Al-Quds kasalxonasi yonilg‘i va elektr quvvati yo‘qligi sababli o‘z faoliyatini to‘xtatdi. 

Tibbiyot muassasasi 11-noyabr kuni tegishli vaziyat yuzasidan ogohlantirgan edi.

“Shifoxona Isroilning tinimsiz bombardimon qilishlari tufayli o‘z holiga tashlab qo‘yildi, bu tibbiyot xodimlari, bemorlar va ko‘chirilgan tinch aholi uchun katta xavf tug‘dirdi”, — deydi Falastin Qizil yarim oy jamiyati.

Shifoxonaga xizmat ko‘rsatishning to‘xtatilishi yonilg‘i zaxiralarining tugashi va elektr ta’minotidagi uzilish bilan bog‘liq. Shu bilan birga, tibbiyot xodimlari dori-darmon, oziq-ovqat va suv yetishmasligiga qaramay, bemorlar va yaradorlarga yordam ko‘rsatish uchun barcha sa’y-harakatlarini amalga oshirgan.

Qizil yarim oy jamiyati shifoxonalar qamal ostida, tanklar bilan o‘ralganini ma’lum qildi. Isroil mudofaa kuchlari buni rad etdi. Al-Quds kasalxonasidagi vaziyat haqida so‘ralganda, Isroil rasmiylari shunday dedi: 

“Isroil armiyasi ushbu hududda HAMASga qarshi intensiv kurash olib bormoqda va HAMASdan farqli o‘laroq, qonunga amal qiladi, tinch aholiga zararni kamaytirish uchun barcha choralarni ko‘radi”.

7-oktyabrdan buyon G‘azoga berilgan zarbalar oqibatida halok bo‘lganlar soni 11 ming kishidan oshdi, ularning to‘rt mingdan ortig‘i bolalardir. Bundan tashqari, texnikalar yetishmasligi sababli vayronalar ostidan jarohatlanganlarni olib chiqish imkoniyati yo‘q. O‘z navbatida, bu halok bo‘lganlar sonining ortishiga sabab bo‘lishi mumkin.