Rossiya kompaniyalari Qozog‘istonda uchta issiqlik elektr stansiyasi qurilishida ishtirok etadi va allaqachon butadien ishlab chiqaruvchi zavod qurilishi bilan shug‘ullanmoqda. Bu haqda Orda.kz xabar berdi.
Rossiya prezidenti Vladimir Putinning Qozog‘istonga rasmiy tashrifi doirasida ikki mamlakat energetika vazirlari Ko‘kshetau, Semey, Ust-Kamenogorsk issiqlik elektr stantsiyasini qurish loyihalari bo‘yicha hamkorlik bo‘yicha memorandumni imzoladi.
Qozog‘iston bosh vaziri o‘rinbosari Serik Jumangarin issiqlik elektr stansiyalari bo‘yicha hamkorlik haqida avvalroq ma’lumot bergandi.
“Rossiya tomonining Qozog‘istondagi uchta issiqlik elektr stansiyasi loyihalarini amalga oshirishdagi ishtiroki to‘g‘risida bugun tegishli hujjat imzolanishini kutmoqdamiz”, — degan edi u.
Shu bilan birga, Qozog‘iston prezidenti Qosim-Jo‘mart To‘qayev “Tatneft” kompaniyasi bilan yiliga 340 ming tonnagacha quvvatga ega Qozog‘iston-Rossiya butadien zavodi qurilishi boshlanganini aytdi. Bundan tashqari, polietilen ishlab chiqaradigan korxona qurish bo‘yicha muzokaralar yakunlandi.
Semeyda quvvati 320 megavat va 1200 Gkal/soat, Ko‘kshetauda esa 240 megavat va 520 Gkal/soat bo‘lgan issiqlik elektr stansiyasini qurish rejalashtirilgan.
Qozog‘iston bosh vaziri o‘rinbosari Roman Sklyar jurnalistlarga ko‘mirda ishlaydigan issiqlik elektr stansiyalari zamonaviy texnologiyalar yordamida qurilishini aytdi.
“Ko‘kshetauda umuman issiqlik elektr stansiyasi yo‘q, Semeyda IES qurish kerak, hozir texnik-iqtisodiy asoslar ishlab chiqilmagan, keyingisi esa Ust-Kamenogorskda bo‘ladi. Bizda mavjud bo'lgan 37 ta issiqlik elektr stansiyalarida Sovet Ittifoqi davridagi texnologiyalar mavjud. Yangilarini qurishda Rossiya o'z texnologiyalari bilan keladi”, — degan bosh vazir o‘rinbosari.
Izoh (0)