Россия компаниялари Қозоғистонда учта иссиқлик электр станцияси қурилишида иштирок этади ва аллақачон бутадиэн ишлаб чиқарувчи завод қурилиши билан шуғулланмоқда. Бу ҳақда Орда.кз хабар берди.
Россия президенти Владимир Путиннинг Қозоғистонга расмий ташрифи доирасида икки мамлакат энергетика вазирлари Кўкшетау, Семей, Уст-Каменогорск иссиқлик электр станциясини қуриш лойиҳалари бўйича ҳамкорлик бўйича меморандумни имзолади.
Қозоғистон бош вазири ўринбосари Серик Жумангарин иссиқлик электр станциялари бўйича ҳамкорлик ҳақида аввалроқ маълумот берганди.
“Россия томонининг Қозоғистондаги учта иссиқлик электр станцияси лойиҳаларини амалга оширишдаги иштироки тўғрисида бугун тегишли ҳужжат имзоланишини кутмоқдамиз”, — деган эди у.
Шу билан бирга, Қозоғистон президенти Қосим-Жўмарт Тўқаев “Татнефть” компанияси билан йилига 340 минг тоннагача қувватга эга Қозоғистон-Россия бутадиэн заводи қурилиши бошланганини айтди. Бундан ташқари, полиэтилен ишлаб чиқарадиган корхона қуриш бўйича музокаралар якунланди.
Семейда қуввати 320 мегават ва 1200 Гкал/соат, Кўкшетауда эса 240 мегават ва 520 Гкал/соат бўлган иссиқлик электр станциясини қуриш режалаштирилган.
Қозоғистон бош вазири ўринбосари Роман Скляр журналистларга кўмирда ишлайдиган иссиқлик электр станциялари замонавий технологиялар ёрдамида қурилишини айтди.
“Кўкшетауда умуман иссиқлик электр станцияси йўқ, Семейда ИЭС қуриш керак, ҳозир техник-иқтисодий асослар ишлаб чиқилмаган, кейингиси эса Уст-Каменогорскда бўлади. Бизда мавжуд бўлган 37 та иссиқлик электр станцияларида Совет Иттифоқи давридаги технологиялар мавжуд. Янгиларини қуришда Россия ўз технологиялари билан келади”, — деган бош вазир ўринбосари.
Изоҳ (0)