G‘arbiy Sohilda Falastin prezidenti Mahmud Abbosning karvoni o‘qqa tutildi. Abbosning qo‘riqchilaridan biri otib o‘ldirilgan va hujumni “Abu Jandal o‘g‘illari” guruhi o‘z zimmasiga olgan. Bu haqda Turkiyaning Sabah va Milliyet nashri xabar berdi.
Xabarga ko‘ra, “Abu Jandal o‘g‘illari” Mahmud Abbosga Isroilga qarshi chora ko‘rishi uchun 24 soat muhlat bergan. Belgilangan muddat tugashi bilan 7-noyabr kuni Abbosning kortejiga hujum uyushtirilgan. To‘qnashuvda Abbosning tansoqchilaridan biri otib o‘ldirilgan.
Abbos 5-noyabr kuni G‘arbiy Sohilda AQSH davlat kotibi Entoni Blinken bilan kutilmagan uchrashuv o‘tkazdi. Blinken bilan uchrashuvda Abbos Isroildan G‘azoga hujumlarini to‘xtatishni so‘radi. Siyosatchilar o‘rtasidagi uchrashuv bir soatdan kam davom etgan.
“G‘azo sektoridagi Falastin xalqimiz Isroil harbiy mashinasi tomonidan, xalqaro huquq tamoyillarini hisobga olmasdan, boshdan kechirgan genotsid va vayronagarchilikni ta’riflashga so‘zim yo‘q”, — dedi Abbos Blinken bilan uchrashuvda.
Blinken esa falastinliklar majburan ko‘chirilishi kerak emasligini aytgan va Vashington mustaqil Falastin davlatini barpo etish intilishlarini ro‘yobga chiqarish uchun “harakat qilishga sodiq” ekanini bildirgan. Biroq AQSH davlat kotibi o‘t ochishni to‘xtatish haqida so‘z ochmagan.
Izoh (0)